Ўзбекистондаги иккита йирик тижорат банкига раҳбар тайинланди
Тошкент. 29 май. ЎзТАГ – Ўзбекистон ҳукуматининг қарори билан Ўзбекистондаги иккита йирик тижорат банкига янги раҳбар тайинланди, деб хабар беради 12news.uz янгиликлар агентлиги.
Ўзбекистон Республикаси Ташки иқтисодий фаолият миллий банки раисининг биринчи ўринбосари Нозим Хусанов “Микрокредитбанк” ОАТБнинг, “Ўзсаноатқурилишбанк” ОАТБнинг бошқаруви раиси Абдурасул Абдуллаев Ўзбекистон Республикаси Давлат тижорат Халқ банки бошқаруви раиси этиб тайинланди.
38 ёшли Нозим Хусанов 1997 йилда Тошкент Автомобил йўллари институтини, 2002-йилда эса Тошкент молия институтини тугатган. 2007-йилда у Ўзбекистон Республикаси Президенти ҳузуридаги Давлат ва жамият қурилиши академиясини битирган. 1998-йилдан бери банк соҳасида ишлаб келади.
Ўз навбатида 46 ёшли Абдурасул Абдуллаев 1991-йилда Тошкент Давлат Халқ хўжалиги институтини “Бухгалтерлик ҳисоби, назорат ва хўжалик фаолияти таҳлили” мутахассислиги бўйича тугатган. 1995-йилдан бери Ўзбекистон банк тизимида ишлайди.
