Ўзбекистонга италян бизнес доираларининг йирик делегацияси келмоқда
Тошкент. 9 декабр. ЎзТАГ – Бугун Ўзбекистонга италян бизнес доираларининг йирик делегацияси келмоқда, деб хабар беради Ўзбек телеграф агентлиги (ЎзТАГ).
“Италия-Ўзбекистон” Қўшма савдо палатаси президенти Луижи Иперти бошлиқ делегация таркибига Tecnocad Progetti, MEC, Mobitecno, CNL, Meccanotecnica Umbra ва бошқа таниқли италян компаниялари вакиллари кирганлар”, – деб таъкидлашди Ўзбекистон Савдо-саноат палатаси матбуот хизматида.
Ташриф давомида икки бизнес-форум, шунингдек, ўзбек бизнеси ва давлат органлари вакиллари билан учрашувлар, эркин саноат ҳудудларига ташриф кабилар режалаштирилган. Италян тадбиркорлари Ўзбекистон ва Марказий Осиё ҳудуди бозоридаги янги тамойилларни батафсил муҳокама қилишни режалаштирмоқдалар.
Италян компаниялари Ўзбекистонда алоқалар ўрнатиш ва текстиль, машинасозлик, озиқ-овқат, фармацевтика ва энергетика, қишлоқ хўжалик ускуналари ишлаб чиқариш каби соҳаларда биргаликда ишлаб чиқаришларни йўлга қўйишга алоҳида эътибор қаратадилар.
