Ўзбекистонга ташриф буюрган сайёҳлар орасида Россия, Туркия ва Афғонистон етакчилик қилмоқда

Тошкент. 7 июнь. ЎзТАГ – Ўзбекистонга ташриф буюрган сайёҳлар орасида Россия, Туркия ва Афғонистон етакчилик қилмоқда, дея хабар беради Ўзбек телеграф агентлиги (ЎзТАГ).

"2019 йилнинг I чорагида хорижий сайёҳлар сони 1,3 миллион кишини ташкил этди. Бу кўрсаткич 2018 йилнинг шу даврига нисбатан 42 фоизга (2018 йилнинг 1-чораги учун-972,2 минг киши) юқоридир. (...) Узоқ хориж ва МДҲ давлатларидан Ўзбекистонга энг кўп сайёҳлар Россия, Туркия, Афғонистон, Хитой, Корея ва бошқа мамлакатлардан келади", - дейилади туризмни ривожлантириш давлат қўмитаси матбуот хизмати хабарида.

Қайд этилганидек, МДҲ ва узоқ хориждан келган хорижий сайёҳлар сонининг ўсиши 38% ни ташкил этди. Марказий Осиё мамлакатларидан сайёҳлар сонининг ўсиши 44% ни ташкил этди.

Жумладан, ҳисобот даврида Ўзбекистонга 82,6 минг Россия фуқаролари, 12,7 минг Туркия фуқаролари, 12,1 минг Афғонистон фуқаролари, 9,4 минг Хитой фуқаролари, 6,8 минг Корея Республикаси фуқаролари, 5,1 минг Ҳиндистон фуқаролари, 2,8 минг Озарбайжон фуқаролари, 2,7 минг Украина фуқаролари, 2,1 минг Германия фуқаролари, 2 минг Япония фуқаролари, 1,8 минг АҚШ фуқаролари, 1,7 минг Молдова фуқаролари, 1,5 минг Буюк Британия фуқаролари, 1,3 мингдан Беларус ва Италия фуқаролари, 1,3 минг Франция фуқаролари ва 1 минг Исроил фуқаролари ташриф буюришган.

Туристларнинг асосий қисми (86,1%) дўстлар ва қариндошларини кўриш учун, 10,3% дам олишга, 1,2% даволаниш ва соғломлаштириш процедураларини қабул қилиш ва бошқалар учун ташриф буюришади.

Сурат манбаи: theopenasia.net