Ўзбекистонлик боксчи Руслан Чагаев РФ фуқаролигини олишни режалаштирмаётганлигини баён қилди
Тошкент. 15 сентябр. ЎзТАГ – Бутунжаҳон Боксчилар ассоциацияси (WBA) версияси бўйича ўта оғир вазн тоифасида жаҳон чемпиони, асли ўзбекистонлик боксчи Руслан Чагаев РФ фуқаролигини олишни режалаштирмаётганлигини баён қилди. Бу ҳақида ТАСС хабар қилди.
“Ҳозирда бундай ниятим йўқ, - деди Чагаев. – Мен Ўзбекистон фуқаросиман. Мен учун Қозоғистон, Ўзбекистон, Россия, Украина бу Совет Иттифоқидир. Балким мен олдинги авлод каби фикрларман, лекин мен миллат ажрата олмайман. Мен ўзимни айнан аниқ бир республика фуқароси дея олмайман, менинг турли мамлакатларда дўстларим кўп. Совет Иттифоқи одамиман. Мен ҳозир Россияга тез-тез келиб тураман, лекин ўзбек паспорти билан ҳеч қандай муаммога дуч келганим йўқ”.
“Пуэрториколик Фреса Окендо билан 2014 йил 6 июлдаги Грознийда бўлиб ўтган жангда Чагаев рингга россия байроғи остида чиққан эди. Шунингдек, у россиянинг “Терек бокс ивент” компанияси номидан курашмоқда”, - деб таъкидлайди агентлик.
Эслатиб ўтамизки, ҳаваскорлар орасида икки марта жаҳон чемпиони ва Осиё чемпионатида икки бор ғолиб чиққан 36 ёшли Чагаев профессионал карьерасида 34 ғалабага эришган (21 – нокаут билан), икки марта мағлубиятга учраб, бир марта дуранг натижа қайд этган.
2015 йил 11 июлда бўлиб ўтган сўнгги жангда Чагаев биринчи раундда италиялик Франческо Пьянетуни нокаутга учратган эди. Чагаевнинг кейинги жанги 17 октябрда Киле (Германия) шаҳрида Окендога қарши бўлиб ўтади.
