Ўзбекистонлик боксчи Руслан Чагаев ўз мақомини ҳимоя қилиб, Владимир Кличко билан жангга тушиш ҳуқуқини қўлга киритди

Тошкент. 13 июл. ЎзТАГ – 36 ёшли ўзбекистонлик боксчи Руслан Чагаев ўз мақомини ҳимоя қилиб, Владимир Кличко билан жангга тушиш ҳуқуқини қўлга киритди, деб хабар беради Ўзбек телеграф агентлиги (ЎзТАГ).

Германиянинг Магдебург шаҳрида бўлиб ўтган 12-раундлик жангда ўзбекистонлик боксчи италиялик Франческо Пьянетани биринчи бўлимдаёқ техник нокаут билан енгди. “Чагаевнинг рақиби раунд давомида икки марта полга йиқилди. У жангни давом эттира олмайди, деб ҳисоблаган ҳакам баҳсни тўхтатди”, – деб хабар бермоқда НТВ.

Эслатиб ўтамизки, Чагаев ўтган йили июлда Грознийда очколар бўйича америкалик Фрес Окендо устидан ғалаба натижасида эришган мақомини илк марта ҳимоя қилди. Энди унда 34 ғалаба (21 нокаут), 2 мағлубият ва 1 дуранг бор.

WBA бўйича ушбу тоифада суперчемпион мақоми украиналик Владимир Кличкога тегишли. Лекин Кличкога етиб бориш учун Руслан икки муаммони ҳал қилиши керак. 

Биринчи – Фрес Окендо билан реванш жанги. Америкалик бундан олдин Чагаев жамоасини шартнома мажбуриятларини бузишда айблаб судга берган эди. Кейинчалик, томонлар келишув шартномаси имзолаган бўлсаларда, Магдебургдаги жанг ғолиби тўрт ой ичида америкалик боксчи билан жанг ўтказиши керак.

Иккинчидан, реванш-жанг ғолиби бошқа бир даъвогар – австралиялик Лукас Браун билан ҳам жангга чиқиши керак.