Ўзбекистонлик футболчи Одил Аҳмедов “Шанхай Шанган”га ўтганини орқага кетиш деб ҳисобламайди
Тошкент. 6 январ. ЎзТАГ – Ўзбекистонлик футболчи Одил Аҳмедов россиянинг “Краснодар” клубидан “Шанхай Шанган”га ўтганини орқага кетиш деб ҳисобламайди, деб хабар беради Ўзбек телеграф агентлиги (ЎзТАГ).
“Мен Хитой чемпионатига ўтишни касбий жиҳатдан орқага қадам ташлаш деб ҳисобламайман. Ҳозирда бу чемпионатда дунёнинг етакчи футболчилари ўйнашмоқда ҳамда бу лига жамоаларини энг яхши мураббийлар бошқаришмоқда. Хусусан, мен қарор қабул қилишдан олдин Виллаш-Боаш билан гаплашдим. У менга жамоадаги вазиятни ва мен бу клубда эгаллайдиган ўринни тушунтириб берди. Мен шундан кейингина қарор қабул қилдим”, - деди Аҳмедов ТАССга берган интервьюсида.
Шунингдек, у унга нафақат хитой лигасидан, балки европадан ҳам таклифлар тушганлигини айтиб ўтди.
“Менда нафақат Хитой лигасидан, балки Европа жамоаларидан ҳам таклифлар бор эди. Бироқ мен барча таклифларни кўриб чиқиб, Хитой клуби таклифини қабул қилдим. Чунки у “Краснодар”га жуда фойдали эди”, - деди Аҳмедов.
Менинг янги жамоага ўтишим миллий терма жамоага ҳам яхши бўлади, чунки мураббийлар штаби менинг ўйинимни кузатиб боришади, деб давом эттирди у.
“Афсуски, жамоа билан хайрлашишга улгурмадим. Боиси, таътил бошланиши биланоқ жўнаб кетган эдим. Шартнома имзолашдан олдин Сергей Галицкий менга кўнғироқ қилди, бир-биримизга омад тиладик. Мен Сергей Николаевич каби инсонлар Россия футболига керак деб ҳисоблайман. У Россия футболи учун кўп иш қилмоқда. Мен унинг ўз жамоаси билан Россия чемпиони бўлишини тилайман, чунки у бунга муносиб”, - дея таъкидлади Аҳмедов.
