Ўзбекистонлик футболчи Виталий Денисов октябрдаги осиёлик энг яхши топ-10 ўйинчилар орасида иккинчи бўлди

Тошкент. 14 ноябр. ЎзТАГ – Москванинг “Локомотив” ва Ўзбекистон термасининг ҳимоячиси Виталий Денисов октябр ойи якунларига кўра Европада ўйнаётган осиёлик энг яхши топ-10 ўйинчилар орасида иккинчи бўлди, деб хабар беради Ўзбек телеграф агентлиги (ЎзТАГ).

Денисов “Аугсбург”да ўйнаётган Ку Жа Чхолдан (Жанубий Корея) кейинги ўринда турибди. Виталийдан кейин эса “Саутгемптон” ўйинчиси япон Мая Есида, эронлик Алиреза Яханбакш (АЗ) ва Реза Гучаннежад (Херенвен), япон Майк Хавенар (АДО Ден Хааг) ва бошқалар боришмоқда.

Маълумот ўрнида, футболчиларни умумий баҳолашда голлар, голли етказмалар, паслар аниқлиги ва ўйинчиларнинг рейтинги каби омиллар ҳисобга олинади.

Жорий йил февралда Москванинг “Локомотив” клуби ҳимоячиси италиянинг “Лацио” клубига ўтиши мумкинлиги ҳақидаги маълумотни рад этган эди.

Кейинроқ, март охирида FIFA.com Денисов билан эълон қилган эксклюзив интервьюсида Ўзбекистон термасининг Россиядаги 2018 йилги Жаҳон чемпионатига чиқиш эҳтимолини қуйидагича баҳолади: “Мен Ўзбекистонда туғилган русман. Ўзбекистон футболини Россияда тақдим этмоқдаман ва ўйлайманки, бу ишни муносиб бажармоқдаман. Ва ҳақиқатдан ҳам Россияда Жаҳон чемпионатида ўйнашни орзу қиламан. Бу умрда бир марта келадиган камёб имкониятдир”.