Ўзбекистонлик курашчи Сослан Тигиев допинг истеъмол қилгани учун Пекин Олимпиадасининг кумуш медалидан маҳрум қилинди

Тошкент. 27 октябр. ЎзТАГ – Эркин кураш бўйича Ўзбекистон термаси аъзоси Сослан Тигиев допинг истеъмол қилгани учун Пекин Олимпиадасининг кумуш медалидан маҳрум қилинди, деб хабар беради Ўзбек телеграф агентлиги (ЎзТАГ).  

“Ўзбекистонлик спортчи Сослан Тигиевнинг қонида таъқиқланган туринабол анаболик стероиди топилди. Ўзбекистон Миллий олимпиа қўмитаси кумуш медални тезда ХОҚга қайтаришни таъминлаши зарур”, - деб таъкидланади Халқаро олимпиа қўмитаси хабарида.

Тигиевдан ташқари ХОҚ қайта допинг текширувидан кейин 2008 йилги Олимпиаданинг яна беш спортчисини ҳам медаллардан маҳрум қилди. Уларнинг бари МДҲ вакиллари. Булар украиналик оғир атлетикачи Ольга Коробка (кумуш), белоруслик оғир атлетикачи Андрей Рибаков (кумуш), қозоғистонлик эркин курашчи Таймураз Тигиев (кумуш), белроруслик оғир атлетикачи Анастасия Новикова (бронза) ва россиялик енгил атлетикаси Екатерина Волковалардир (бронза).

Эслатиб ўтамизки, 2012 йилда С.Тигиев допинг можаросига аралашиб қолган эди. Ўшанда у метилгексанамин препаратини истеъмол қилгани учун Лондондаги ёзги Олимпиаданинг бронза медалидан маҳрум қилинган эди.