Ўзбекистонлик олти спортчи енгил атлетика бўйича Хитойда бўлиб ўтадиган Осиё чемпионатида қатнашади

Тошкент. 12 июн. ЎзТАГ – 12 - 15 июн кунлари Тайпей (Хитой) шаҳрида Ўсмирлар ўртасида енгил атлетика бўйича XVI Осиё чемпионати бўлиб ўтади, дея хабар беради Ўзбек телеграф агентлиги (ЎзТАГ).
“Чемпионатда Ўзбекистондан олти спортчи – икки ўсмир ва тўрт қиз – қатнашади. Узоққа сакраш ва уч ҳатлаб сакрашда қизлар орасида Оксана Молчанова ва Виктория Дирдиналар, ўсмирлар ўртасида эса Тимур Хуснуллин совринлар учун курашади. 100 ва 200 метрга югуриш, шунингдек, 200 ва 400 метрга югуришда мамлакат шарафини Нигина Шарипова ва Лилия Манасиповалар ҳимоя қиладилар. Яна бир қобилиятли спортчи – енгил атлетикачи Артем Давлетов ядро ирғитишда кучини синаб кўради”, - деб таъкидлашди Ўзбекистон Енгил атлетика федерацияси матбуот хизматида.