Ўзбекистонлик теннисчи Денис Истомин Ноттингемдаги турнирнинг яримфиналига чиқди

Тошкент. 26 июн. ЎзТАГ - Ўзбекистонлик теннисчи Денис Истомин Ноттингемдаги АТР турнирининг ¼ финалида аргентиналик Леонардо Майерни қийин кечган баҳсда 6:3, 6(8):7(10), 7(8):6(6) ҳисобида енгиб, мусобақанинг яримфиналига чиқди, деб хабар беради Ўзбек телеграф агентлиги (ЎзТАГ).

Бугун Истомин тошкент вақти билан 4 соатлардан кейин турнир яримфиналида ҳозирда АТР рейтингида 59-ўринда бўлган кипрлик Маркос Багдатис билан беллашади. У 2006 йилда дунёнинг энг кучли теннисчилари сафида эди. Ўз навбатида,Багдатис 1/4 финалда италиялик спортчи Симоне Болеллини 6:4, 6:4 ҳисобида енгган.

Бошқа яримфинал баҳсида украиналик Александр Долгополов ва америкалик Сэм Куэррилар учрашадилар.

Эслатиб ўтамизки, Ноттингемнинг очиқ чемпионати – ушбу британ шаҳрида июн ойида чимли кортларда ўтказиладиган профессионал теннис турниридир. 2015 йилдан бери соврин жамғармаси 589 минг евролик эркаклар турнири ATP 250 сериясига киради. Турнирнинг яккалик баҳсларида 48 иштирокчи қатнашади.

Ҳозирда Денис Истомин АТР рейтингида 92-ўринда бормоқда.