Ўзбекистонлик яримҳимоячи Одил Аҳмедов “Краснодар” ўйинчисига айланди
Дата: 17:50, 12-06-2014.
Тошкент. 12 июн. ЎзТАГ - Ўзбекистонлик таниқли яримҳимоячи Одил Аҳмедов “Краснодар” ўйинчисига айланди, дея хабар беради Ўзбек телеграф агентлиги (ЎзТАГ).
Бу тўғрисидаги расмий маълумот “Краснодар” футбол клубининг расмий сайтида эълон қилинди.
Одил Аҳмедов билан бирга янги клубга илгари доғистон клуби таркибида ўйнаган хужумчи Никита Бурмистровнинг ҳам ўтгани хабар қилинмоқда. 26-ёшли Аҳмедов билан имзоланган келишув икки йилга, 24-ёшли Бурмистров билан келишув эса уч йилга мўлжалланган.
Эслатиб ўтамизки, “Анжи” таркибига ўтгунга қадар Одил Аҳмедов 5 йил давомида тошкентнинг “Пахтакор” жамоасида ўйнаган ва икки марта Ўзбекистоннинг энг яхши ўйинчиси деб топилган эди. Футболчи 3 йил давомида “Анжи” асосий таркибида ўйнади ва жамоа учун 86 ўйин ўтказиб, 3 та гол урди.
2013 йилда британ ОАВлари ушбу ўйинчига лондоннинг “Арсенал”и томонидан қизиқиш билдирилаётганлиги ҳақида бир неча маротаба ёзишган эди. Яримҳимоячи Ўзбекистон терма жамоасининг етакчиларидан бири бўлиб, унинг таркибида 56 ўйин ўтказган ва 9та гол урган.
Бундан бир оз илгари ушбу таниқли ўзбек ўйинчисига бирқатор хорижий ва россия клубларининг қизиқиш билдираётганлиги ва унинг “Краснодар” таркибига қўшилиши мумкинлиги ҳақида хабар қилган эдик.
