Ўзбекистоннинг биринчи ракеткаси Денис Истомин Australian Open 2016ни тарк этади

Тошкент. 19 январ. ЎзТАГ – Бундан бир оз олдин Ўзбекистоннинг биринчи ракеткаси Денис Истомин 1:3 ҳисобида Бернард Томичга енгилди ва Australian Open 2016ни тарк этади, деб хабар беради Ўзбек телеграф агентлиги (ЎзТАГ).

Қайд этиш керакки, 23 ёшли австралиялик учун бу оддий ғалаба бўлмади. Биринчи сетнинг тай-брейкида Денис вазиятни ўз ҳисобига 7:4 шаклида ўзгартиришга эришди. Аммо кейинги сетларда Бернард 6:4 ҳисобида ғалаба қозонди.

Эслатиб ўтамизки, Australian Open – мавсумдаги “Катта дубулға” тоифасидаги илк турнир. У илк маротаба 1905 йилда Warehouseman's Cricket Ground (Мельбурн) стадионининг чимли кортларида ўтказилган. 1927 йилгача Австралазиячемпионати деб аталган.

Турнир Австралиянинг беш ва Янги Зеландиянинг икки шаҳрида ўтказилган. Мельбурн турнирни 54 марта, Сидней 17марта, Аделаида 14 марта, Брисбенда 7 марта, Персда 3 марта қабул қилганлар. Янги Зеландияда турнир икки марта – Крайстчерт ва Хейтингсда ўтказилган. 1979 йилдан бери турнир Мельбурна ўтказилади.

Фақат 1916-1918 йилларда ва 1941-1945 йиллардан ташқари чемпионат ҳар йили ўтказилади.