Ўзбекистоннинг биринчи ракеткаси Монте-Карлодаги турнирнинг иккинчи доирасида жаҳоннинг энг кучли теннисчиси билан беллашиши мумкин

Тошкент. 13 апрел. ЎзТАГ – Ўзбекистоннинг биринчи ракеткаси Денис Истомин Монте-Карлодаги АТР Masters турнирининг иккинчи доирасида жаҳоннинг энг кучли теннисчиси Новак Жокович билан беллашиши мумкин, дея хабар беради Ўзбек телеграф агентлиги (ЎзТАГ).

Унга қадар эса ўзбекистонлик спортчи биринчи доирадаги учрашувда испаниялик Альберт Рамосни енгиши зарур. 28-ёшли Истомин бугунда АТР рейтингида 66-ўрнида, 27 ёшли Рамос эса 67-ўрнида бормоқда. Ўзбек теннисчисининг бугунгача эришган энг яхши натижаси 2012 йилда қўлга киритилган бўлиб, ўшанда Истомин 33-ўринга чиққан бўлса, Рамос 2012 йил майда 38- бўлган.

Хуллас, ҳар икки теннисчининг кўрсаткичлари бир-бирига яқин, шу сабабли ўйин қизғин кечиши кутилмоқда.

Қизиғи, очиқ манбаларда Денис Истомин ва Альберт Рамосларнинг шахсий урашувлардаги натижаларини топиб бўлмади.

Айни пайтда, Новак Жокович ва жаҳоннинг қатор теннисчилари турнирни иккинчи доирадан бошлайдилар.

Monte-Carlo Rolex Masters турнири эркаклар ўртасида франциянинг Рокебрюн-Кап-Мартен шаҳрида ўтказиладиган теннис турниридир. Мусобақа апрел-майда тупроқли очиқ кортларда ўтказилади.