Ўзбекистоннинг энг йирик автомобил заводи кроссовер ва минивен русумидаги янги автомобилларни ишлаб чиқаришни режалаштирмоқда

Тошкент. 23 сентябр. ЎзТАГ – Яқин йиллар орасида Ўзбекистоннинг энг йирик автомобил заводи – GM Uzbekistan (Uz-Daewoo) кроссовер ва минивен русумидаги автомобилларни ишлаб чиқаришни режалаштирмоқда, дея хабар беради Ўзбек телеграф агентлиги (ЎзТАГ).

Украинанинг AUTO-Consulting автомобил нашри маълумотларига кўра, яқин бир неча йил ичида GM Uzbekistan ўзи ишлаб чиқараётган автомобиллар сонини камида учта янги модел ҳисобига кўпайтириш ниятида. Улар орасида минивэн вакроссовер русумидаги автомобиллар ҳам бўлади.

“2016 йил ўртасида чиқадиган янги моделлардан бири кейинги авлод Nexia седани бўлади. Икки йилдан кейин эса Chevrolet Lacetti модели асосида қурилган Gentraнинг янгиланган кўринишини ишлаб чиқариш йўлга қўйилади. Автомобилнинг ташқи ва ички кўриниши бутунлай янгиланади. 2017 йилда Uz-Daewoo “В” тоифасидаги янги минивэн ва хэтчбекни ишлаб чиқара бошлайди. Ушбу модел Datsun mi-Do автомобилига рақобатчи бўлади. 2018 йилдан кейин эса компания унча қиммат бўлмаган кроссовер русумидаги моделни ишлаб чиқаришни режалаштирмоқда”, - деб қайд этади нашр.

Эслатиб ўтамизки, яқинда ЎзТАГ 2015 йилда GM Uzbekistan янги “Т250” (Chevrolet Aveo) моделини ишлаб чиқаришни режалаштираёгани ҳақида хабар қилган эди.