Ўзбекистоннинг иккинчи энг йирик мобил алоқа операторида бош директор ўзгарди

Тошкент. 2 август. ЎзТАГ – Ўзбекистоннинг иккинчи энг йирик мобил алоқа оператори – Ucellда бош директор ўзгарди, дея хабар қилади Ўзбек телеграф агентлиги (ЎзТАГ) компания матбуот хизматига асосланган ҳолда.

“Тону Грюнбергни Евроосиёдаги энг тез ўсаётган операторлардан бири бўлган Ucell компаниясининг янги Бош директори сифатида қутлашдан мамнунман”, - деб таъкидлади TeliaSonera гуруҳи вице-президенти ва компаниянинг Евроосиё ҳудуди бўйича бўлинмаси раҳбари Эрик Халберг.

Бундан олдин Т.Грюнберг TeliaSonera компаниясининг Евроосиё ҳудудида технологиялар бўйича вице-президенти лавозимида ишлаган.

Эслатиб ўтамизки, Ucell – TeliaSonera швед телекоммуникацион компаниясининг 100% шўъба ширкати ҳисобланади. 2014 йилнинг иккинчи чораги якунлари бўйича унинг абонентлари сони 8,5 млн киши атрофида бўлган.

Бундан олдин Ucell компаниясининг бош директори вазифасини Осман Турон бажараётган эди. Ucellга ўтганига қадар у Непалдаги Ncell мобил операторининг бош директори бўлиб ишлаган. Ncellга келгунга қадар эса, Турон 8 йил давомида Грузиянинг етакчи мобил оператори бўлган Geocellни бошқарган.