Ўзбекистоннинг иккинчи ракеткаси Вроцлавдаги АТР Челленжер турнирининг чоракфиналига чиқди

Тошкент. 20 феврал. ЎзТАГ – Бугун тошкент вақти билан соат 20.00да Ўзбекистоннинг иккинчи ракеткаси 28 ёшли Фарруҳ Дўстов Вроцлавдаги (Польша) АТР Челленжер турнирининг чоракфиналида яна бир немис теннисчи – Михаэл Беррер билан кортга тушади, дея хабар беради Ўзбек телеграф агентлиги (ЎзТАГ).

Бундан олдинроқ, турнирнинг учинчи доирасида ўзбек теннисчиси (жаҳоннинг 118- ракеткаси, турнирда 3- энг кучли теннисчи) қийин кечган баҳсда немис Филипп Петцшнерни 7:6, 7:5 ҳисобларида енгган эди.

Ўз навбатида, олдинги босқичда Михаэл Беррер эстон теннисчиси Юрген Цоппни 6:3, 7:6 ҳисобларида мағлуб этган эди.

Айни пайтда 34 ёшда бўлган Беррер АТР рейтингида камтарин 171- ўринда. Аммо унинг 26-ёшли Цоппни енггани спортнинг яхши психологик тайёргарлигидан далолат беради.

Бошқа чоракфинал учрашувида бельгиялик Стив Дарсис (жаҳоннинг 115-ракеткаси) ва россиялик Константин Кравчуклар (жаҳоннинг 202- ракеткаси) кортга тушадилар.

Яримфиналда эса Дўстов – Беррер ва Дарсис – Кравчук жуфтликлари ғолиблари учрашади.