Ўзбекистоннинг Россиядаги элчихонаси Астрахан вилоятида истиқомат қилаётган ўзбекистонликлар учун қабул уюштирди
Тошкент. 21 июн. ЎзТАГ – Ўзбекистоннинг Россиядаги элчихонаси Астрахан вилоятида истиқомат қилаётган ўзбекистонликлар учун қабул уюштирди, деб хабар беради Ўзбек телеграф агентлиги (ЎзТАГ).
Ўзбекистон ташқи ишлар вазирлигининг маълумотига кўра, у 5 июлда Ўзбекистон ташқи ишлар вазирининг ватандошлари билан бўлажак тўғридан тўғри мулоқотига тайёргарлик доирасида ўтказилган.
Учрашувларда турли масалалар, жумладан, ноқонуний миграция, одам савдоси, диний экстремизм, кишиларни террористик фаолиятга лжалб қилишнинг олдини олиш масалалари муҳокама қилинди.
Ташриф буюрган мамлакат қонунларига сўзсиз амал қилиш, хужжатларини асраб авайлаш зарурияти таъкидланди.
Кўчма консуллик қабули доирасида фуқаролик, қайтиш сертификатларини расмийлаштириш, туғилганликни расмийлаштиришга доир 51 хужжат кўриб чиқишга қабул қилинди.
Дипломатлар Астрахандаги хорижий фуқароларни сақлаш жойига ташриф буюрдилар ва унинг раҳбарияти билан учрашдилар. Бу ердаги музокараларада қўлга олинган шахслар хужжатларини расмийлаштиришда алоқаларни соддалаштиришга келишиб олинди.
Бундан олдин элчихона вакиллари РФнинг Ростов вилояти ва Краснодар ўлкасида ҳам кўчма қабуллар ўтказдилар.
Яқин орада Москвадан олис бошқа ҳудудларга ҳам консуллик бўлими ходимларининг ташрифларини уюштириш режалаштирилмоқда.
