Жанубий Африканинг Sasol ширкати Ўзбекистонда GTL заводи қуриш лойиҳасидан чиқиши мумкин
Тошкент. 10 март. ЎзТАГ – Жанубий Африка Республикасининг Sasol компанияси 2016 йилнинг биринчи ярмида Ўзбекистонда синтетик ёнилғи ишлаб чиқарувчи Uzbekistan GTL заводи қурилишида ўзининг кейинги иштирокини қайта кўриб чиқишни режалаштирмоқда, деб хабар беради Ўзбек телеграф агентлиги (ЎзТАГ) компаниянинг расмий хабарига асосланган ҳолда.
“Нефть нархи тушиб кетиши сабабли компания 2016 йил февралда Ўзбекистонда GTL завод қурилишидаги узоқ муддатли иштирокини қайта қўриб чиқишга қарор қилди. Компаниянинг лойиҳадаги иштироклари борасида якуний қарор 2016 йилнинг биринчи ярмида қабул қилинади”, - деб таъкилдлашди ширкат матбуот хизматида.
Эслатиб ўтамизки, 2009 йил ноябрда “Ўзбекнефтгаз” Миллий холдинг компанияси, ЖАРнинг Sasol ва Малайзиянинг Petronas компаниялари Ўзбекистонда Шўртан газ-кимё мажмуаси негизида GTL завод қуриш учун Uzbekistan GTL қўшма корхонасини ташкил этган эди. Айни вақтда қўшма корхона лойиҳа учун қўшимча иштирокчиларни фаол равишда қидирмоқда. Лойиҳанинг умумий қиймати $5,6 млрдга тенг.
Янги қуриладиган завод учун асосий хом-ашё Шўртан газ-кимё мажмуасида ишлаб чиқарилади. Бошланғич маълумотларга кўра, завод йилига 3,5 млрд куб метр газни қайта ишлаши ва 864 минг тонна дизель ёнилғиси, 304 минг тонна авиакеросин, 395 минг тонна нафта ва 11,2 минг тонна сиқилган газ ишлаб чиқариш имконига эга бўлади.
