Жанубий Кореянинг “Эксимбанк”и Тошкентда Маълумотларни қайта ишлаш маркази қурилиши учун $25,5 млн ажратади

Тошкент. 25 июн. ЎзТАГ – Тошкентда “электрон ҳукумат” тизими учун замонавий Маълумотларни қайта ишлаш маркази қуриш режалаштирилмоқда. Бу ҳақида бугун пойтахтда бўлиб ўтган брифингда Ўзбекистон Ахборот технологиялари ва коммуникацияларни ривожлантириш вазирининг биринчи ўринбосари Алишер Файзуллаев маълум қилди, деб хабар беради Ўзбек телеграф агентлиги (ЎзТАГ).

“Лойиҳанинг умумий қиймати $30 млн бўлиб, унинг $25,5 млнини Жанубий Кореянинг “Эксимбанк”и кредит шаклида беради. Қолган қисми Ўзбекистон томонидан тикилмоқда. Марказ давлат органлари томонидан фойдаланилаётган маълумотларни сақлаш ва қайта ишлаш билан шуғулланади. Бугунда лойиҳа хужжатлари ишлаб чиқилмоқда, кейин ускуналар етказиб берувчи танланади”, – деди Алишер Файзуллаев.

Вазир ўринбосарининг маълумотига кўра, июлда Ўзбекистонга лойиҳани тайёрлашга кўмак берувчи корейс IT-мутахассислари делегацияси ташриф буюради.