ЖЧ-2014: Африка вакили плей-оффда, Месси эса Шакирига қарши ўйнайди

Тошкент. 26 июн. ЎзТАГ – Африка вакили Нигерия плей-оффга чиқди, Аргентина термаси эса 1/8 финалда Швейцария термасига қарши ўйнайди, дея хабар беради Ўзбек телеграф агентлиги (ЎзТАГ) футбол бўйича Бразилиядаги жаҳон чемпионатининг ўн тўртинчи куни ҳал қилувчи ўйинлари ортидан.
ЖЧ-2014нинг янгилиги сифатида Жанубий Америка ва Европа жамоалари баҳсига Африка вакили – Нигерия термаси қўшилганлигини айтиб ўтиш мумкин. Плей оффнинг биринчи босқичида Муса ва Эменике жамоаси 1998 йилги жаҳон чемпиони – Франция термасига қарши майдонга тушади. Бошқа бир ўйинда эса Аргентина ва Швейцария ёки Месси билан Шакири ўйнайди.
Аслида ўтган куннинг энг қизиқарли ўйини Аргентина ва Нигерия қарама-қаршилиги бўлди. Лионель Месси ва Аҳмад Мусанинг дубллари футбол байрамини безади. Агар аргентиналикларнинг учинчи голи бўлмаганда, ўйин дуранг билан якунланарди.
Энди Мессига келсак, Нигерия билан ўйинда у яна ўзини кўрсатди. Унинг биринчи зарбаси тўпи эсингиздами? Голларичи? Шундай пайтларда Месси зўрми, Роналдуми, деган саволга ўз-ўзидан жавоб топилади – Месси.
Эрон ва Босния ўйинида босниялик Эдин Джеко биринчи голни урганидан кейиноқ кўп нарса маълум бўлди. Ўйин натижаси ҳеч нарсани ҳал қилмасада, Босния 3:1 ҳисобида ғалаба қилди.
Швейцария ва Гондурас ўйинида “Бавария” яримҳимоячиси Жердан Шакири ўзини кўрсатди. Унинг уч голини ҳам ёш футболчиларга намуна деса бўлади – мана қандай гол уриш керак! Гондурас 90 дақиқа курашганига қарамасдан шарманда бўлди...
Тўғриси, Франция-Эквадор ўйинининг бошқачароқ бўлишини кутган эдим. Французларнинг “шарофати” билан зерикарли дуранг қайд қилинди. Лекин шарҳловчи бундай ўйин билан Франция 1/8 финалга чиқиб ўтирмаса ҳам бўлар эди деганини, очиқчасига айтганда, тушунмадим.
Чемпионатнинг 14 кунидан кейин плей-офф босқичига Жанубий Америкадан 7 жамоа, Европадан 4 жамоа ва Африка қитъасидан 1 жамоа (лекин қандай!!!) чиқди.