ЖЧ-2014: Аргентина-Голландия ўртасидаги яримфинал ўйиннинг тақдирини ўйиндан кейинги пенальтилар ҳал қилди

Тошкент. 10 июл. ЎзТАГ – Аргентина-Голландия ўртасидаги иккинчи яримфинал ўйиннинг тақдирини ўйиндан кейинги пенальтилар ҳал қилди, дея хабар беради Ўзбек телеграф агентлиги (ЎзТАГ) футбол бўйича Бразилиядаги жаҳон чемпионати иккинчи яримфинал учрашуви ортидан.
Умуман, Месси ва Роббен жамоалари ўртасидаги баҳс дуранг билан якунланиб, асосий ва қўшимча вақтда ғолиб аниқланмади.
Агар учрашув бошида голландияликлар фаолроқ бўлишган бўлса, биринчи таймнинг иккинчи ярмида ташаббус аргентиналиклар қўлига ўтди. Жанубий Америка қитъаси вакиллари прессинг қўллаган ҳолда рақибга тўпни бир-бирларига бемалол узатишга имкон бермадилар. Натижада, Ван Персига тўп узатиш билан тугалланадиган хужум стратегияси ишламай қолди. Бунинг устига, голландлар узун пасдан кўпроқ фойдаланишга мажбур бўлдилар, лекин бу узатишларнинг ҳам кўпи ноаниқ бўлди. Ва ниҳоят, аргентиналиклар Роббеннинг тезлашишига имкон бермадилар, бусиз эса жамоа динамикани йўқотди.
Юқоридаги омиллар туфайли биринчи таймда голли вазиятлар бўлмади.
Ҳар икки жамоа хато қилишдан чўчиган ҳолда ўта эҳтиёткорлик билан ўйнади.
Аргентиналиклар орасида Месси ва Лавесси фаоллиги билан ажралиб турди. Лекин ҳимоя чизиқлари бехато ишлади. Хуллас, ҳар икки жамоа қўшимча вақтни кутиб ўйнади.
Қўшимча вақтнинг биринчи бўлимида Голландия мураббийси Луи ван Гал катта хатога йўл қўйиб, ван Персини Хунтелаар билан алмаштирди. Натижада жамоада яна пенальтиларни яхши ушловчи дарвозабон Крулни ўйинга тушириш имконияти қолмади.
Қўшимча вақтда Роббен икки бор аниқ имкониятдан фойдалана олмади. Ўз навбатида, қўшимча вақтнинг сўнгида Родриго Паласио ва Макси Родригеслар ҳам голли вазиятни қўлдан чиқардилар.
Натижада Месси ва Роббен қарама-қаршилиги ўрнига Серхио Ромеро ва Яспер Силессен дуэли юз берди.
Ўйиндан кейинги пенальтилар сериясида голландиялик Рон Влаар ва Уэсли Снейдерлар гол ура олмадилар.
Учрашув 4:2 ҳисобига Аргентина фойдасига ҳал бўлди.
Иккинчи яримфинал кўпчилик кутганидек ёрқин бўлмади.
Месси Роббен билан дуэлда ғолиб чиқолмади. Ромеро Силессенга қараганда сергакроқ бўлиб чиқди. Лекин асосийси Аргентина термаси бош мураббийси Сабелья ҳамкасби ван Гални тактик жиҳатдан енга олди. Айнан унинг тактикаси голландияликларнинг суръатини пасайтиришга имкон берди ва қарши хужумдан гол ўтказиб қўйишнинг олдини олди.
Сабелья Германия бош мураббийси Себастьян Левни ҳам алдай оладими-йўқми – буни финалда билиб оламиз!