ЖЧ-2014: Германия термаси муносиб равишда жаҳон чемпиони бўлди

Тошкент. 14 июль. ЎзТАГ. Бугун тунда Германия терма жамоаси иродали ўйин кўрсатиб, Аргентинани 1:0 ҳисобида енгди ва жаҳон чемпиони бўлди, дея хабар беради Ўзбек телеграф агентлиги (ЎзТАГ) футбол бўйича Бразилияда якунланган жаҳон чемпионати финал ўйини ортидан.
Аслида ўйиндан олдин ҳам немисларнинг кучлилиги ойдин эди. Буни жамоа ўйинларининг статистикасидан ҳам билиб олиш мумкин эди. Жамоа бош мураббийси Йоахим Лев рақибга доимий равишда босим ўтказишга қодир бўлган ҳақиқий “немис машинаси”ни ярата олди.
Италиялик ҳакам Рицоллининг ҳуштаги чалинмасдан олдиноқ Аргентинанинг рақибдан кучсизроқ эканлиги ҳам маълум эди. Жамоа таркибида жаҳонннинг энг зўр ўйинчиси Лионель Мессининг борлиги унга фақат битта қўшимча имконият берар эди холос...Фақат битта имконият...
Ўйин, кутилгани каби, немисларнинг тўпни тўлиқ назорат қилишларидан бошланди. Аргентиналиклар бунга бошида қарши хужумлар билан жавоб бериб турдилар ва бу тактика иш берадигандан туюлди. Ҳатто аргентиналиклар хужумчиси Гонсало Игуаин бир сафар немислар дарвозабони билан яккама якка чиқди, лекин тўпни қулай вазиятдан дарвозага йўллай олмади. Яна бир ҳолда Мессининг майдон ўнг қанотидан етказиб берган қулай тўпини дарвозага киритадиган одам топилмади. Шу ерда Ди Мариянинг майдонда йўқлиги панд берди.
Шундан кейин немислар фаол хужумга ўтдилар, бир сафар дарвоза тўсини Аргентина жонига оро кирди. Бутун ўйин давомида мени бошқа кўпчилик ишқибозлар сингари “футбол байрами” туйғуси тарк этмади. Чунки жамоалар гол урмаган бўлсаларда, яхши ўйин кўрсатдилар. Тўпни аниқ етказиб беришлар, чиройли комбинациялар, бутун жамоа бўлиб хужум уюштиришлар мухлисларни хурсанд қилди. Ҳатто аргентиналиклар ҳам бир неча марта гол уриш имкониятига эга бўлдилар, лекин Нойернинг ажойиб ўйини бунга ҳалақит берди.
Шунда Йоахим Лев олдин Шюррле, бир оз кейин Гетцени ўйинга киритди. Айнан ана шу икки ўйинчи қўшимча вақтда Германияга чемпионатда ғалаба келтирган тўпни киритдилар. Шюррле чап қанотдан етказиб берган тўпни Гетце кўкраги билан тўхтатиб, ўнг турчакка чиройли қилиб йўналтирди - гол.
Хуллас, Германия муносиб равишда жахон чемпиони бўлди. Чунки ушбу жамоада бир ўйинчи кирита олмаган тўпни иккинчиси киритади. Шу сабабли ҳам бу жамоани “машина” дейдилар.
Айтмоқчи, Швайнштайгер немис жамоасидаги ўнг яхши ўйинчилардан бири бўлди. У майдон марказида асосий вазифани бажарди. Бир сафар рақиблардан бири билан тўқнашиб кетиб, қовоғи ёрилиб ҳам кетди. Аммо ҳакам бунинг учун аргентиналикларга ҳеч нима демади...
Бироқ немислар бундай ҳолатларга умуман эътибор бермадилар. Ҳакамга эътироз ҳам билдирмадилар, шунчаки ўйнни давом этдилар, 1:0 ҳисобида юта туриб ҳам вақтни чўзганлари йўқ.
Буни ҳақиқий эркакча ўйин деса бўлади.
Таҳлил сўнгида Германия муносиб равишда жаҳон чемпиони бўлганлигини яна бир марта қайтараман. Бундай жамоа билан фахрланса арзийди. Бундай жамоага ҳавас қилса арзийди.