ЖЧ-2014: Месси Шакирига, Бельгия АҚШга қарши тушадиган плей-офф босқичининг тўртинчи куни ўта қизиқарли бўлиши кутилмоқда

Тошкент. 1 июл. ЎзТАГ - Месси Шакирига, Азар Демпсига қарши майдонга тушадиган плей-офф босқичининг тўртинчи куни ўта қизиқарли кечиши кутилаётган бўлсада, Германия-Жазойир ўйинидан кейин бундай дейиш ўта енгилтаклик бўлурди, дея хабар беради Ўзбек телеграф агентлиги (ЎзТАГ) футбол бўйича Бразилияда ўтаётган жаҳон чемпионати плей-офф босқичи Аргентина-Швейцария ва Бельгия-АҚШ ўйинлари олдидан.
Аргентина Швейцарияга қарши тошкент вақти билан соат 21.00да, Бельгия эса АҚШга қарши саот тунги 01.00да майдонга тушади.
Келинг, Аргентина-Швейцария ўйинидан бошлай қолайлик.
Аргентина гуруҳдаги 100 фоизлик натижага қарамасдан плей-оффга “судралиб” келди, деса бўлади. Босния устидан зўрға 2:1 ҳисобидаги ғалаба, Мессининг Эрон билан ўйиндаги голи ва яна ўша Мессининг Нигерия билан ўйиндаги (3:2) кўрсатган қаҳрамонлиги аргентиналикларнинг ушбу мундиалда яхши жамоавий ўйин кўрсатмаётганлигидан далолат беради.
Швейцария гуруҳда 6 очко жамғарди. Олдинига терма жамоа Эквадорни 2:1 ҳисобида ютди, кейин Францияга йирик ҳисобда (2:5) ютқазди ва Гондурасни ишончли 3:0 ҳисобида енгди. Юқоридаги ҳар ўйинда Жердан Шакири “асосий скрипка” ролини ўйнади.
Шу сабали бугунги ўйинда Месси ва Шакири ўртасида “отишма” бўлиб ўтади, дейиш мумкин.
Энди Бельгия-АҚШ ҳақида.
Ким нима дейишидан қатъий назар, айнан Россияга қарши ўйин ¼ финалга ўтиши мумкин бўлган Бельгияни кўрсатди. Бельгияликларнинг Фабио Капелло жамоасига қарши 70-88-минутларда кўрсатган ўйинни сифатли ва самарали футбол намунаси деса бўлади.
Айнан шу жамоада англиянинг “Эвертон” клуби хужумчиси Ромелу Лукаку, лондоннинг “Челси” жамоаси яримҳимоячиси Эден Азар каби ўйинчилар бор. Агар улар яхши ҳолатда майдонга чиқишса, бельгияликларнинг америкаликларга нисбатан имкониятлари кескин ошади.
Ўз навбатида, АҚШ Бельгияга қарши жамоавий ўйинни, “Сиэтл Саундерс” командасининг 31 ёшли хужумчиси Клинт Демпсига узоқдан бериладиган аниқ узатишларини қарши қўйиши мумкин. Чунки узоқдан аниқ етказиб бериладиган узатишлар европа жамоаларининг ожиз жиҳатлари ҳисобланади. Бунга биз Бельгия Россия ўйинида гувоҳ бўлдик.
Агар ўйин суръати юқори бўлмаса, бельгияликлар (Мертенсни эсланг) америкаликларни юқори техника ҳисобига ютадилар.
Хуллас, бугун бизни яна бир ҳаяжонли ва эҳтиросли футбол томошаси кутмоқда.