ЖЧ-2014: Ҳозирча лотинамерикаликлар европаликларни 3:1 ҳисобида енгмоқда

Тошкент. 24 июн. ЎзТАГ – Ҳозирча лотинамерикаликлар европаликларни 3:1 ҳисобида енгмоқда. Яъни, жаҳон чемпионатининг 1/8 финалига Лотин Америкасидан уч жамоа ва Европадан бир жамоа чиқди, дея хабар беради Ўзбек телеграф агентлиги (ЎзТАГ) чемпионатнинг навбатдаги куни ўйинларидан кейин.
Голландия терма жамоаси Чили термасини 2:0, Мексика эса Хорватия термасини 3:1 ҳисобида енгди. Лекин ушбу ўйинда кўпчилик кутган қизиқарли футбол бўлмади.
Эсингизда бўлса, илгари “учар голландлар” испанларни (5:1), кейинчалик австралияликларни (3:2) ҳисобида енгиб, гуруҳда етакчиликни қўлга киритишган эди. Лекин бу сафар улар таркибида жуда яхши ўйин кўрсатаётган хужумчи Робин ван Перси йўқ эди.
Лотинамерикаликлар бунга қадар австралияликлар (3:1) ва испанларни (2:0) енгган ва 1/8 финалда бразилияликлар билан учрашмаслик учун гуруҳда биринчи ўринни эгаллашни жуда исташаётган эди.
Натижада чилиликлар ўйиннинг 66% вақтида тўпга эгалик қилсаларда, гол ура олмадилар. Голландларда эса Робеннинг ёрдамида 77-минутда Лерой Феру биринчи тўпни киритди, қўшимча вақтда эса яна бир тўп киритилди.
Умуман, ўйин тўпга кўпроқ эгалик қилиш ғалабани англатмаслигини кўрсатди. Ушбу ўйин сценарийси Чемпионлар лигасидаги мадриднинг “Реал” ва мюнхеннинг “Бавария” жамоалари ўртасидаги ўйинни эслатди.
Яна бир драматик ўйин хорватлар ва мексикаликлар ўртасида бўлди.
Хорватларга ҳам осон бўлгани йўқ. Бразилия билан бўлган биринчи ўйинда япониялик ҳакамнинг кўмаги билан жамоа камида бир очко йўқотди. Кейинчалик жамоа Камерун устидан 4:0 ҳисобида ғалаба қилди.
Мексикаликлар эса чемпионатдаги энг прагматик жамоа бўлса керак. Уларга бунга қадар Камерунни минимал фарқ билан енгишди ва бразилияликлардан деярли бутун ўйин давомида ҳимояланишди. Ўйиннинг биринчи 45 минутида улар ташаббусни хорватларга бергани ҳолда, қарши хужумлар уюштириб туришди. Лекин иккинчи таймда ўйинга Чичарито кириши билан ҳақиқий мексиканча ўйин бошланди. Натижада улар хорватлар дарвозасига 3та тўп киритдилар. Хорватлар эса атига уларнинг биттасига жавоб бердилар.
Энди чемпионатнинг 1/8 финалида бразилияликлар чилиликлар билан, мексикаликлар голландлар билан куч синашадилар. Хуллас, юқорида айтганимиз каби: лотинамерикаликлар европаликлар устидан 3:1 ҳисобида олдинда! Осиёлик ва африкаликлар эса ҳали уларнинг ҳеч бирига рақиблик қила олмаяптилар.