ЖЧ-2014: Суареснинг чақуви, Англиянинг ношуд ўйини ва бошқа можаролар ҳақида...

Тошкент. 25 июн. ЎзТАГ – Уругвайлик хужумчи Луис Суареснинг тишлаши, грекларнинг плей-оффга жасораткорона чиқиши, Англия термасининг очиқдан-очиқ ёмон ўйини – футбол бўйича Бразилиядаги жаҳон чемпионатининг ўн тўртинчи куни ана шулар билан эсда қолди, дея хабар беради Ўзбек телеграф агентлиги (ЎзТАГ).
Айтмоқчи, энг асосий ўйин – Уругвай ва Италия терма жамоалари ўртасидаги ўйин ҳаяжонли кечган бўлсада, негадир зерикарли бўлди.
Уругвайликларга ғалаба керак бўлсада, негадир биринчи таймда майдонда бемалол ўйнадилар. Балки жамоа мураббийси Оскар Табарес иккинчи таймда кучлироқ ўйнашни тайинлагандир. Яна ким билади?
Айни пайтда италияликларни дуранг қониқтирар эди. Лекин улар биринчи таймда ёмон ўйнамадилар, Андреа Пирло эса ажойиб тўплар етказиб беришни давом этди.
Бироқ негадир Англия билан ўйинда супернатижа кўрсатган Луис Суарес бу сафар очилмади ва бутун ўйин давомида жаҳл устида италияликлар ҳимоячиси Жоржио Кьеллинини тишлаб олгани билан эсда қолди холос.
Шу сабабли, Халқаро футбол федерацияси (FIFA) Суаресга қарши иш очди ва у жами 24 матчга ўйиндан четлатилиши ҳам мумкин. Тўғриси, бу уругвайлик хужумчининг учинчи тишлаши. Биринчи марта буни у 2010 йилда, голландиянинг “Аякс”и учун ўйнаб юрган пайтлари қилган эди. Тишлоғичнинг қилиғидан ПСВ ўйинчиси Отман Баккал жабр кўрганди. Ўша ҳодисадан кейин Суарес эса жами етти учрашувга ўйиндан четлатилди. Иккинчи марта ана шундай ҳодиса 2013 йилда юз берди. “Ливерпуль” сафида тўп сурган Суарес “Челси” ҳимоячиси Бронислав Ивановични тишлаб олган эди. FIFA бу сафар нима қарорга келиши ҳали ноъмалум. Ҳатто Уругвай ЖЧ-2014 охиригача ўз хужумчисидан ажралиши ҳам мумкин.
Қизиғи, бу сафар италянларнинг ишонган тоғи Марио Балотелли ҳам жимиб қолди... Яна тўғриси, бу гапни бутун Италия жамоаси ҳақида ҳам айтиш мумкин.
Уругвайликлар Италия дарвозасига бошлари билан гол урдилар ва жамоа 1/8 финалга чиқди.
Худди шу куни колумбияликлар 4:1 ҳисобида японлардан осонгина устун келди.
Куннинг сенсацияси – Греция термасининг Кот-д’Ивуар устидан ғалабаси бўлди... Аслида ушбу ўйин кўпроқ африкаликлар устунлигида кечганлигини айтмаса...
Шу билан бирга, англияликлар чемпионатни сассизгина тарк этиб, имкониятларининг ярмича ҳам ўйнай олмадилар. Коста-Рика билан дуранг натижа ушбу жамоанинг тақдири ҳақида кўплаб саволлар туғдиради.
Хуллас, 1/8 финалда Греция-Коста-Рика ва Колумбия-Уругвай учрашади.
Чемпионатнинг 14 кунидан кейин ҳисоб 1:З, яъни лотинамерикаси жамоалари фойдасига! Умумий қитъалараро ҳисобда ҳам европаликлар устун эмас – 2-6.
Осиё ва Африка жамоалари эса бу баҳсга ҳали бери ҳалақит бера олмайдилар.