ЖИДУ қошида Лестер Халқаро тадқиқотлар олий мактаби ташкил этилади

Тошкент. 13 сентябр. ЎзТАГ – Жаҳон иқтисодиёти ва дипломатия университети (ЖИДУ) қошида Лестер Халқаро тадқиқотлар олий мактаби ташкил этилади. Янги муассаса етакчи британ ОТМнинг бири билан биргаликда илмий тадқиқотлар олиб бориши кўзда тутилмоқда, деб хабар беради Ўзбек телеграф агентлиги (ЎзТАГ).

Бу ҳақида 11 сентабр куни Ўзбекистон Ташқи ишлар вазирлигида Лестер Университетининг (Буюк Британия) проректори Сара Диксон бошчилигидаги делегация билан учрашувда сўз борди.

Сара Диксоннинг сўзларига кўра, ЖИДУ қошида Лестер Халқаро тадқиқотлар олий мактабини яратиш ҳақидаги ҳамкорлик Меморандуми 2017 йил 3 май куни имзоланган.

Унда турли соҳаларда биргаликда илмий тадқиқотлар олиб бориш кўзда тутилган.

ТИВ маълумотига кўра, учрашувда Буюк Британиянинг етакчи университетларидан бири ҳисобланган Лестер Университетининг Ўзбекистон таълим муассасалари билан Ўзбекистон-Буюк Британия муносабатларини мустаҳкамлаш доирасида ҳамкорликнинг истиқболли йўналишлари юзасидан батафсил суҳбат бўлиб ўтди.

Томонлар учрашув чоғида икки мамлакат олий ўқув юртлари ўртасидаги алоқаларни янада ривожлантиришда, жумладан, Лестер Университети билан Ўзбекистоннинг бошқа университетлари ўртасида алоқаларни кенгайтиришга томонларда қизиқиш мавжудлиги тасдиқладилар.