Жорий йил охирига қадар Корея фонд биржаси Ўзбекистон учун ускуналар етказиб беришни якунлайди
Тошкент. 1 май. ЎзТАГ – Жорий йил охирига қадар Корея фонд биржаси Ўзбекистон учун ускуналар етказиб беришни якунлайди. Ускуналар Ягона дастурий-техник мажмуа яратиш тўғрисидаги келишувга мувофиқ етказиб берилмоқда, деб хабар беради Ўзбек телеграф агентлиги (ЎзТАГ).
Хусусийлаштириш давлат қўмитасидан хабар қилишларича, бу ҳақида Тошкентда қўмита раҳбариятининг KRXнинг ривожланаётган мамлакатлардаги бизнесни ривожлантириш Департаменти бошлиғи Стив Дайчун Ким ва KoreanInvestment&SecuritiesCo., LTD брокерлик компанияси таҳлилчиси Мюнг-Ван Юн ўртасидаги учрашувда айтиб ўтилган.
Эслатиб ўтамизки, 2011 йил 23 августда Корея Республикаси президенти Ли Мен Бакнинг Ўзбекистонга ташрифи доирасида Хусусийлаштириш давлат қўмитаси ва Корея фонд биржаси ўртасида Ўзбекистон Республикаси қимматли қоғозлар бозорини модернизация қилиш бўйича бош шартнома имзоланган эди.
Унга мувофиқ, KRX Ягона дастурий-техник мажмуани етказиб бериш ва ишга туширишни амалга оширади. Учрашувда юқоридаги шартноманинг бажарилиши муҳокама қилинган.
2015 йил охиригача KRX IT-технология ва дастурий таъминотни етказиб бериши, уни ўрнатиб, созлаш ишларини амалга ошириши таъкидланди. Шунингдек, KRX фонд бозорини фаоллаштириш ва уни ликвидлик билан бойинтириш бўйича комплекс чораларни амалга оширишда кўмаклашади.
