ЎзРТХБда 15 минг тоннадан зиёд полипропилен сотилди
Тошкент. 4 май. ЎзТАГ – 2016 йилнинг июлидан буён “ЎзРТХБ” АЖнинг биржа савдоларида “Uz-Kor Gas Chemical” МЧЖ ҚҚда ишлаб чиқарилган 15 минг тоннадан зиёд полипропилен сотилди, деб хабар беради Ўзбек телеграф агентлиги (ЎзТАГ).
ЎзРТХБ маълумотларига кўра, шу билан бирга агар 2016 йил давомида мазкур маҳсулотнинг биржа орқали ўртача ойлик сотиш ҳажми 2,4 минг тоннани ташкил этган бўлса, жорий йилда ушбу кўрсаткич 58%га ўсиб, 3,8 минг тоннани ташкил этди.
Рекорд кўрсаткич эса 2017 йилнинг апрел ойига тўғри келиб, ушбу даврда электрон савдолар орқали 4,3 минг тонна полипропилен сотилди.
Биржа савдоларида полипропиленнинг асосий харидорлари сифатида Самарқанд ва Сирдарё вилоятлари, ҳамда Тошкент ҳудудларининг корхоналари иштирок этиб, уларнинг полипропилен сотув таркибидаги улуши 88%га етди.
Полипропиленнинг “тола” гуруҳи гилам маҳсулотларини ишлаб чиқаришда асосий хом-ашё сифатида фойдаланилади, “ип” гуруҳи – полипропилен қопларини ишлаб чиқаришда, “инъекцион” полипропилен – яшик, таглик, хўжалик ва канцелярия товарлари, ўйинчоқлар, ҳамда маиший техникани корпусини ишлаб чиқаришда фойдаланилади.
