Ўзбек депутатлари “Инвестиция фаолияти тўғрисида”ги қонуннинг янги таҳририни қабул қилдилар

Тошкент. 30 октябр. ЎзТАГ – Тошкентда Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди, дея хабар беради Ўзбек телеграф агентлиги (ЎзТАГ).

Депутатлар янги таҳрирдаги “Инвестиция фаолияти тўғрисида”ги қонун лойиҳасини иккинчи ўқишда кўриб чиқдилар. Ушбу ҳужжат хўжалик юритувчи субъектлар ва фуқароларнинг инвестиция жараёнларидаги иштирокини кенгайтиришга, ишлаб чиқаришни модернизация қилиш, техник ва технологик қайта жиҳозлашга, инвестициялар киритиш учун қўшимча рағбатлар ва шароитлар яратишга, шунингдек, инвестицияларни рағбатлантириш, инвесторларнинг ҳуқуқ ва мулкларини ҳимоя қилиш усулларини кенгайтиришга қаратилган” – деб таъкидлашди парламент қуйи палатаси матбуот хизматида.

Қонуннинг амалдаги таҳририга инвестиция лойиҳасини рўёбга чиқаришда инвестицияларни амалга оширишни, инвестиция фаолиятини рағбатлантиришни тартибга солувчи янги моддалар киритилди.

Бундан ташқари, инвестиция фаолиятининг объектлари ва субъектлари, инвесторларнинг ҳуқуқлари, инвестиция фаолияти субъектларининг ўзаро муносабатлари, марказлаштирилган ва марказлаштирилмаган инвестициялар, инвестиция жамғармалари, инвестиция фаолияти субъектлари ҳуқуқларининг кафолатлари каби ҳуқуқий тушунчаларни белгилаб берувчи моддалар, бошқа нормалар сезиларли равишда кенгайтирилди. 

Ҳар томонлама ва моддама-модда муҳокама якунларига кўра, Қонунчилик палатаси ушбу қонунни қабул қилди. Қонун Ўзбекистон Республикаси Олий Мажлисининг Сенатига (юқори палата) юборилади.