“Ўзбекинвест” Ўзбекистон миллий авиакомпаниясининг суғуртачиси бўлди
Тошкент. 30 июл. ЎзТАГ – Экспорт-импортни суғурталаш бўйича “Ўзбекинвест” миллий компанияси (ЭИСМК) “Ўзбекистон ҳаво йўллари” миллий авиакомпанияси билан авиация суғуртаси бўйича шартномалар имзолади, дея хабар беради Ўзбек телеграф агентлиги (ЎзТАГ).
Суғурта компаниясидан хабар қилишларича, бундан олдинроқ у “Ўзбекистон ҳаво йўллари”нинг 32 ҳаво кемасига суғурта хизматлари кўрсатиш ва авиакомпаниянинг 2014-2015 йиллар учун жавобгарлиги бўйича тендерда ғолиб чиққан эди.
“Ўзбекинвест” компанияси томонидан қабул қилинган таваккалчилик қайта суғурталанган ва унинг асосий қисми лондон андеррайтерлар бозорида жойлаштирилган.
“Ўзбекинвест”нинг қайд этишича, “Ўзбекистон ҳаво йўллари”нинг парки икки қисмга бўлинган. Ғарбий флот “Боинг” ва “Эйрбас” ҳаво кемаларидан ташкил топган бўлиб, у «ИЛ-114» самолётларидан иборат Шарқий флотдан алоҳида суғурта қилинади.
“Ўзбекинвест” ва “Ўзбекистон ҳаво йўллари” ўртасидаги суғурта шартномаси бир йилга тузилган ва июль ойининг ўртасидан бошлаб амалда.
“Ўзбекинвест” суғурта компанияси миллий авиакомпания учун 2002, 2003 ва 2004 йилларда ҳам суғурта хизматлари кўрсатган эди.
Жорий йилда “Ўзбекинвест” ЭИСМК ўзининг 20 йиллигини нишонламоқда. Компания таркибида ҳозирда 14 филиал ва 100 ортиқ шаҳар ва туман бўлинмалари мавжуд.
