“Ўзсаноатқурилишбанк” кичик бизнесга 571 млрд сўмдан зиёд маблағ ажратди

Тошкент. 15 июл. ЎзТАГ – 2016 йилнинг I ярим йиллиги давомида “Ўзсаноатқурилишбанк” АТБ кичик бизнес ва хусусий тадбиркорлик субъектларига жами 571,2 млрд сўмлик кредитлар ажратди, деб хабар беради Ўзбек телеграф агентлиги (ЎзТАГ).

Банкдан маълум қилишларича, Хусусан, тадбиркорлик вакилларига 58,4 млрд сўмлик микрокредитлар, аёл тадбиркорлар фаолиятини ривожлантиришга 45,2 млрд сўмлик, хизмат кўрсатиш ва сервис соҳасини кенгайтиришга 53,2 млрд сўмлик, озиқ-овқат истеъмол товарлари ишлаб чиқаришга 99,2 млрд сўмлик, ноозиқ-овқат истеъмол товарлари ишлаб чиқаришга 138,1 млрд сўмлик, оилавий тадбиркорликни ривожлантиришга 9,1 млрд сўмлик кредитлар ажратилди.

Шунингдек, касб-ҳунар коллежлари битирувчиларига тадбиркорлик фаолиятини амалга ошириш учун 11,3 млрд сўмлик кредитлар берилди.

Маълумот ўрнида, “Ўзсаноатқурилишбанк” АТБ Ўзбекистоннинг йирик банкларидан биридир.