Қачон ва нима учун Жанубий Корея президенти Ўзбекистон, Қозоғистон ва Туркманистонга ташриф буюради
Тошкент. 9 апрель. ЎзТАГ – Жанубий Корея президенти Мун Чжэ Ин нега ва нима мақсадда Ўзбекистон, Қозоғистон ҳамда Туркманистонга ташриф буюришини вице-матбуот котиби Ко Мин Чжун айтиб берди, дея хабар беради Ўзбек телеграф агентлиги (ЎзТАГ).
Унинг сўзларига кўра, президент Мун Чжэ Ин 16-23 апрель кунлари Марказий Осиё мамлакатларига ташриф буюради.
16-18-апрель кунларида президент Мун Туркманистонга ташриф буюриб, мамлакат президенти Гурбангули Бердимуҳаммедов билан икки томонлама ҳамкорликни кенгайтириш бўйича олий даражадаги музокаралар олиб боради.
“Президент Муннинг Марказий Осиё мамлакатлари бўйлаб турнесининг иккинчи босқичи 18-21 апрель кунлари Ўзбекистонга бўлади. Бу ерда у ва Ўзбекистон президенти Шавкат Мирзиёев икки давлат ўртасида стратегик шерикликни ривожлантириш ва икки томонлама ҳамкорликнинг “келажаги учун” мустаҳкамлаш масалаларини муҳокама қиладилар”, - деди Ко Мин Чжунг.
Таъкидланганидек, президент Мун 21 апрелдан 23 апрелгача Қозоғистонга ташриф буюради ва март ойида янги лавозимга тайинланган президент Қосим-Жомарт Токаев билан учрашади. Икки давлат раҳбарлари ўртасидаги ишончни мустаҳкамлаш ва икки томонлама ҳамкорликни кенгайтириш бўйича чора-тадбирлар муҳокама қилинади.
“Келгуси президентлик ташрифлари Корея Республикасининг Марказий Осиёнинг учта қўшни давлатлари билан анъанавий ҳамкорлик алоқаларини мустаҳкамлаши, Марказий Осиёнинг шимолидаги (Президент Муннинг) янги сиёсати бўйича консенсусга эришишга кўмаклашиши ва улар билан келажакдаги ҳамкорлик пойдеворини мустаҳкамлашга хизмат қилиши кутилмоқда”, - деб таъкидлади вице матбуот котиби.
Сурат манбаи: english.president.go.kr
