Биринчи ярим йилда Россияда ўзбек автомобиллари сотувлари 57% тушиб кетди

Тошкент. 9 июл. ЎзТАГ – 2015 йилнинг биринчи ярим йили якунлари бўйича Россияда GM Uzbekistan  автомобилларининг сотувлари 57% тушиб кетди, деб хабар беради Ўзбек телеграф агентлиги (ЎзТАГ).

“Кўсатилган муддатда жами 10357 дона автомобил сотилди. Солиштириш учун, ўтган 2014 йилнинг муқобил даврида 24019 дона машина сотилган эди. Июн ойига келсак, ушбу ойда сотувлар 45% қисқариб, 2014 йилдаги 3131 автомобил ўрнига, 2015 йилда 1735 машина ўз эгасини топди”, – деб таъкидланади Европа бизнеси автоишлабчиқарувчилар қўмитаси ассоциацияси хабарида.

Бозорда ўзбек автомобиллари эгаллаб турган улуш 2014 йилнинг биринчи ярмидаги 2%дан 2015 йилнинг биринчи ярми якунлари бўйича 1,3%гача тушди. Айни пайтда жорий йилда илк марта бир ўзбек автомобили энг кўп сотилаётган машиналар рўйхатига кирди. Хусусан, Gentra модели 6688 дона натижа билан Россияда энг кўп сотилган 25-машина орасида сўнгги ўринни эгаллади.