ЕТТБ Ўзбекистон билан $800 млнлик дастур ва лойиҳаларни ишлаб чиқмоқда

Тошкент. 11 июнь. ЎзТАГ – Европа тикланиш ва тараққиёт банки (ЕТТБ) Ўзбекистон билан $800 млнлик дастур ва лойиҳаларни ишлаб чиқмоқда, дея хабар беради Ўзбек телеграф агентлиги (ЎзТАГ).

Бу ҳақда Ўзбекистон президенти Шавкат Мирзиёевнинг 10 июнь куни президент Сума Чакрабарти бошчилигидаги ЕТТБ делегацияси билан учрашувида сўз юритилди.

"Ш. Мирзиёев Ўзбекистон билан Европа тикланиш ва тараққиёт банки ўртасида изчил ривожланиб бораётган ҳамкорлик ва жадал ривожланиб бораётган ўзаро манфаатли ҳамкорликни қайд этди. Сўнгги икки йилда нуфузли халқаро молия институти раҳбарининг Ўзбекистонга учинчи ташрифи ўзаро алмашинувлар фаоллашаётганининг тасдиғидир", – дейилади Ўзбекистон президенти матбуот хизмати хабарида.

Таъкидланганидек, 2019 йил октябрь ойида банкнинг Ўзбекистон бўйича мамлакат стратегияси қабул қилинди. ЕТТБ экспертлари кўмагида бугунги кунда энергетика, банк ва молия тармоқларида, капитал бозорини ривожлантириш ва мамлакатимизда рақобат муҳитини яхшилаш соҳасида ислоҳотлар ишлаб чиқилмоқда ва амалга оширилмоқда.

Қўшма лойиҳалар портфели ҳам ошиб бормоқда. Ўзбекистон Республикаси ҳудудларида энергетика ва коммунал инфратузилмани модернизация қилиш бўйича 600 млн. доллардан ортиқ кредит жалб этган ҳолда қарз битимлари имзоланди ва устувор инвестиция лойиҳалари тайёрланмоқда. Хусусий сектор лойиҳаларига 100 млн доллардан ортиқ инвестициялар киритилди.

"Бундан ташқари, 800 миллион доллар миқдорида истиқболли ижтимоий аҳамиятга эга дастурлар ва лойиҳаларни ишлаб чиқиш амалга оширилади", – дейилади ҳисоботда.

Европа банкининг Тошкентдаги ваколатхонаси актив фаолият юритаётгани, унинг Андижон ва мамлакатимизнинг бошқа ҳудудларида филиаллари очилиши режалаштирилаётгани қайд этилди.

Шунингдек, учрашувда амалий ҳамкорликни ривожлантиришнинг асосий йўналишлари, жумладан, инвестиция лойиҳаларини жадаллаштириш ва кредитларни ўзлаштириш, иқтисодий ислоҳотларни илгари суриш, мамлакатимизда қулай ишбилармонлик муҳити ва инвестиция муҳитини шакллантиришда кўрсатилаётган ёрдамни кенгайтириш масалалари кўриб чиқилди.

Бундан ташқари, Ўзбекистон президенти ҳузуридаги хорижий инвесторлар Кенгашининг биринчи мажлисини ташкил этиш ва тайёрлашга алоҳида эътибор қаратилди.

С.Чакрабарти мамлакатимизда амалга оширилаётган ижтимоий-иқтисодий ислоҳотларнинг суръатлари, кўлами ва амалий натижаларига юксак баҳо бериб, Ўзбекистон билан ҳар томонлама қўллаб-қувватлаш ва кўп қиррали ҳамкорликни давом эттириш тарафдори эканини таъкидлади.

Сурат манбаи: president.uz