Евро-2016: Фернанду Сантуш Адам Навалкага қарши
Тошкент. 30 июн. ЎзТАГ – Тўлқин Ташимов. Бугун тошкент вақти билан соат 00.00да “Велодром” футбол аренасида Евро-2016 1/4 финалида Португалия ва Польша жамоалари майдонга тушадилар, яъни Фернанду Сантуш Адам Навалкага қарши келади.
Йирик турнирлар финали яқинлашган сари бош тренерларнинг аҳамияти оша боради. Шу маънода, сиз ушбу превьюни ўқиётган вақтингизда Португалия термаси мураббийси Фернанду Сантуш Левандовскийни қандай бартараф қилишни ўйламоқда, дейиш мумкин. Ўз навбатида, Польша бош тренери Адам Навалка Роналдуни тўхтатиб қолиш йўлларини қидирмоқда. Бу моҳир футболчиларни бутунлай “ишдан чиқариш” ўта қийин, лекин улардан келиши мумкин бўлган зарарни озайтириш мумкин.
Ўртада Евро-2016 яримфинали эканлигини ҳисобга олсак, ҳар икки тренер жамоаси кейинги босқичга чиқиши учун ҳамма нарсани қилади.
Албатта, Фернанду Криштиануда гол уриш учун реал имкониятлар туғилиши учун унга жамоасининг қўллаб қувватлаши лозимлигини яхши тушунади. Ҳозирги замонавий футбол – спортнинг контактли тури эканлигидан келиб чиқсак, ҳатто ўта талантли бир футболчи ҳам ўйин тақдирини ҳал қилиши жуда мураккаб. Хуллас, айтайлик, Нани қанчалик фаол бўлса, Роналдунинг қулай вазиятга чиқиш имконияти шунча юқори бўлади.
Хорватияга қарши ўйинда ўйин тақдирини ўзгартира олган Ренату Санчеш ёки Куарежме омилларини ҳам ҳисобга олиш керак.
Айни пайтда, Адам ҳам Роберт Левандовскийнинг ишини бир оз енгиллаштириш ҳақида ўйламоқда. Ўтган ўйинларда хужумларни тугаллашда масъулиятни бошқа футболчилар зиммаларига олган эдилар. Масалан, яримҳимоячи Якуб Блащиковский қулай вазиятда чиқиб, бир неча голлар киритган эди. Унинг Украина, Швейцариияга голларини эсланг. Навалка Аркадиуш Милик каби бошқа бир хужумчини ҳам унутгани йўқ. У асосий куч бўлган Левандовскийдан ҳимоячиларни чалғитиши керак.
Бундан ташқари, Сантуш ва Навалка мудофаа сўнгги чизиғи – дарвозабонлар Руй Патрис ва Лукаш Фабьянскийлар ҳақида ҳам ўйламоқда. Чунки айнан уларнинг маҳорати иш пенальтигача бориб етганда жамоага муваффақият олиб келиши мумкин.
Ҳам Португалия, ҳам Польша рақиб олдида қатор устунликларга эга. Фернанду Сантушда жамоа таркиби билан ишлаш бўйича кўпроқ имкониятлар бор. Хусусан, жамоанинг яримҳимоячилари таркиби анча салмоқли. Худди шундай, Адам Навалкида ҳам имкониятлар оз дейиш қийин. Агар Португалия термаси ўйинчилари анча техник бўлишса, Польша термаси ўйинчилари тезкоррроқ.
Масалан, тренерлар жамоаларнинг қайси устунликларидан қанчалик усталик билан фойдаланишларида холос.
Эслатиб ўтамизки, Евро-2016нинг 1/8 финали барча ўйинлари тугалланганидан сўнг биринчилик чоракфиналчиларининг номлари маълум бўлди.
30 июнда Марселда Польша ва Португалия термалари, 1 июлда Лиллда Уэльс ва Бельгия термалари, 2 июлда Бордода Италия ва Германия, 3 июлда Сен-Денида Исландия ва Франция майдонга тушадилар.
Франциядаги Евро-2016нинг яримфинал ўйинлари 6 июлда Лион ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.
Чемпионатнинг финал ўйини 11 июлда “Стад де Франс” стадионида бўлиб ўтади.
