Футбол бўйича жаҳон чемпионатининг биринчи ўйинини бош ҳакам Юити Нисимура хароб қилди, ва Бразилия Хорватияни 3:1 ҳисобида енгди

Тошкент. 13 июн. ЎзТАГ – Футбол бўйича жаҳон чемпионатининг биринчи ўйинини бош ҳакам Юити Нисимура хароб қилди: унинг 71-дақиқадаги хатосидан кейин ўйин тақдири ҳал қилиб бўлинган эди, дея хабар беради Ўзбек телеграф агентлиги (ЎзТАГ).
Ўйиннинг биринчи дақиқалари тенг курашлар остида ўтди. Бразилиликлар тўп билан муомила қилишдаги маҳоратларини кўрсатишга ҳаракат қилдилар. Ўз навбатида, хорватлар хужумчиси Ивица Олич иштирокида бир неча хавфли хужумлар уюштиришди. Айнан Оличнинг узатган тўпидан кейин мезбонлар ўйинчиси Марсело тўпни бехосдан ўз дарвозасига йўналтириб қўйди: ҳисоб - 0:1. Шундан кейин хорватлар прессинг қўллаган ҳолда бирқатор жавоб хужумлари уюштирдилар.
Шундай қийин вазиятларда бразилияликлар жамоаси жонига Неймар оро кирди. Шу ўйинчи Оскар ва Паулиньонинг ёрдамида хорват мудофаасининг ўртасидан ёриб кирди ва ҳисобни 18-20 метрлардан туриб тепилган тўп билан тенглаштирди. Биринчи тайм бразилияликларнинг техник устунлигида ўтди.
Иккинчи таймда жамоалар анча эҳтиёткорлик билан ўйнадилар. Бразилияликлар тўп уришга ҳаракат қилсаларда, хорватия термаси ҳавфли қарши хужумлар уюштириб турди.
Ва ниҳоят, ўйиннинг 71-дақиқасида Стипе Плетикоснинг жарима майдончасида хорват Ловрен ва бразилиялик Фред бир бири билан енгилгина тўқнашиб кетди. Четдан қараганда бунда кўпроқ бразилиялик хужумчининг бир баҳона қилиб йиқилиш истаги кўзга яққол ташланади. Лекин Нисимура пенальти белгилади ва яна ўша Неймар ҳисобни ўзгартирди: 2:1. Кейинчалик бразилияликлар охирги дақиқада яна бир гол урдилар.
Лекин барибир, ўйиннинг тақдирини бош ҳакам ўзининг яққол хатоси билан ҳал қилди, дейиш мумкин. Бундан кейин хорватлар ўзига кела олармикан?