Хитой Ўзбекистонда кичик гидроэлектростанциялар қуришга $58,5 млнлик заём тақдим этади

Тошкент. 11 декабр. ЎзТАГ – Хитой Ўзбекистонда кичик гидроэлектростанциялар қуришга $58,5 млнлик заём тақдим этади, деб хабар беради Ўзбек телеграф агентлиги (ЎзТАГ).

Бу “Туронбанк” ўзбек АТБ ва Хитой Экспорт-импорт банки ўртасида имзоланган келишув билан кўзда тутилган бўлиб, у “Ўзбекгидроэнерго” АЖ лойиҳаларини қайта молиялаштиришга йўналтирилган.

20 йилга ажратилаётган маблағлар Хитой Халқ Республикасидан кичик гидроэлектростанциялар (КГЭС) қурилиши учун ускуналарни харид қилишга мўлжалланган.

Ишлар Ўзбекистон Республикаси Инвестициялар бўйича Давлат қўмитаси ва Хитой Халқ Республикаси Тижорат вазирлиги ўртасидаги КГЭС қуриш ҳақидаги келишув доирасида олиб борилмоқда.

Эслатиб ўтамизки, КГЭС қуриш бўйича давлат келишувларини амалга ошириш мақсадида 2017 йил 17 октябда Ўзбекистон Президентининг “Хитой Халқ Республикасидан ускуналар етказиб бериш асосида Туябўғиз сув омборида кичик ГЭС, Катта Фарғона каналида КГЭС каскади, Оҳангарон дарёсида Қамчиқ КГЭС, Тўпаланг дарёсида Зарчоб КГЭС каскадини қуриш бўйича инвестиция лойиҳасини амалга ошириш чоралари тўғрисида”ги ПҚ-3335-сонли қарори қабул қилинган эди.

Сурат манбаи: http://rosinvest.com/acolumn/blog/jelektrojenergija/167.html