ХВФ таҳлилчилари Ўзбекистон ҳукуматига иқтисодиётни кредитлаш ўсишини 25% пасайтиришни тавсия қилмоқда
Тошкент. 21 ноябр. ЎзТАГ – Халқаро валюта фонди (ХВФ) таҳлилчилари Ўзбекистон ҳукуматига 2019 йилда иқтисодиётни кредитлаш ўсишини 2018 йил сентябридаги 43,5%дан 25%гача пасайтиришни тавсия қилмоқда, деб хабар беради Ўзбек телеграф агентлиги (ЎзТАГ).
“Биз 2019 йил охирида ИНИ бўйича инфляцияни прогноз қилинаётган 17-18%да ушлаб туриш учун 2019 йилда иқтисодиётни кредитлаш ўсишини тахминан 25% пасайтириш зарур деб ҳисоблаймиз. Кредитлаш суръатлари ўсишини секинлаштириш учун ҳукуматнинг иқтисодий чораларни қўллаб-қувватлашга йўналтирилган кредит операцияларини чеклаш, шунингдек, мақсадли кредитлаш бўйича бюджетдан ташқари операцияларни чегаралаш лозим”, - дейилади ХВЖнинг 30 октябрдан 8 ноябргача мамлакатга ташриф буюрган миссияси баёнотининг матнида.
Қайд этилишича, сентябрга келиб (2018 йил – ЎзТАГ) иқтисодиётни кредитлаш 43,5%гача кўпайган (йил ҳисобида).
“Янги кредитларнинг 60%и атрофидаси ҳукумат қарорига кўра берилган ва давлат манбалари, шу жумладан, Ўзбекистон Тикланиш ва тараққиёт жамғармаси (ЎТТЖ) маблағлари ҳисобидан молиялаштирилди. Баҳоларга кўра, қўшимча кредитларнинг ярмидан кўпи имтиёзли шартларда ажратилмоқда. Пул-кредит сиёсати, анъанавий бюджет харажатлари ёки солиқ сиёсатини белгиловчи принциплардан фарқли ўлароқ, манзилли кредитлаш шартлари ва ҳажмларини аниқлаш принциплари шаффоф эмас, кредитлаш ўсишини ошириш ёки пасайтириш ҳақидаги қарорлар эса, кўп эҳтимоли билан, макроиқтисодий сиёсатнинг бошқа чоралари билан мувофиқлаштирилмаган ҳолда қабул қилинмоқда”, - деб таъкидланади ХВФ баёнотида.
Сурат манбаи: https://www.vestifinance.ru
