ХВЖ Ўзбекистон ва бошқа нефть ва газ экспорт қилувчи мамлакатларга бюджетларни ихчамлаштиришни тавсия қилди
Тошкент. 20 май. ЎзТАГ – Халқаро валюта жамғармасининг (ХВЖ) “Ҳудудий иқтисодиёт ривожи истиқболлари: Марказий Осиё мамлакатлари салбий шоклар таъсирини сезмоқдалар” номли маърузасида Ўзбекистон, Озарбайжон, Қозоғистон ва Туркманистонга бюджетларни ихчамлаштиришни тавсия қилди, деб хабар беради Ўзбек телеграф агентлиги (ЎзТАГ).
“ХВЖ фикрига кўра, кўплаб нефть ва газ экспорт қилувчи мамлакатлар ҳозирда прогноз қиланаётган нархларда ўз бюджетларини барқарорлаштира олмас эканлар, улар иложи борича бюджетни консолидация қилиш (ихчамлаштириш) масаласини кўриб чиқишлари зарур. Бу заҳираларни тиклаш, бюджет барқарорлигини мустаҳкамлаш мақсадларида амалга оширилиши зарур”, - дейилади маърузада.
ХВЖ 2015 йилда юқорида тилга олинган мамлакатларда иқтисодиёт ўсиши 2014 йиллдаги 5,5%дан 3,5%га қадар тушишини прогноз қилмоқда.
ХВЖ таҳлилчилари фикрига кўра, нефть ва газ экспорт қилувчи мамлакатлар ташқи позицияси 2015 йилда кескин кучсизланади. Жорий операциялар сальдоси 2014 йилдаги ижобий ЯИМ 3% жорий йилда 2,5% камомад билан алмашинади. Бунга нефть экспортидан тушган даромадларнинг тушиб кетиши сабаб бўлади.
“Нефть нархларининг тушиши бюджетга таъсир қилади. Ҳудуддаги Қозғистон ва Ўзбекистон каби нефть ва газ экспортчилари бунга қарши ўлароқ кейинги йилларда йиғилган катта суммаларни сарфламоқдалар”, - деб ҳисоблайди жамғарма экспертлари.
