Наманганда агросаноат кластери ташкил этилди
Тошкент. 7 сентябрь. ЎзТАГ – Наманганда агросаноат кластери ташкил этилди, дея хабар беради Ўзбек телеграф агентлиги (ЎзТАГ).
Адлия вазирлиги маълумотларига кўра, ҳукуматнинг 2019 йил 5 сентябрдаги "Наманган вилоятининг Мингбулоқ ва Поп туманларида агросаноат кластерини ташкил этиш чора-тадбирлари тўғрисида"ги 736-сонли қарори қабул қилинди.
"Қарор билан Мингбулоқ ва Поп туманларида тўғридан-тўғри хорижий инвестициялар, халқаро молия институтлари маблағлари, хорижий банклар ва тижорат банкларининг кредит линиялари ҳисобидан агросаноат кластерлари ташкил этилди. Шундан келиб чиққан ҳолда, Art Soft Holding» МЧЖ фаолияти йўлга қўйилган бўлиб, унда 19 агросаноат корхонаси мавжуд", - дейилади хабарда.
Хусусан, МЧЖ таркибига кирувчи Art Soft Holding» фермер хўжалигига Мингбулоқ туманида 30,9 гектар (шундан 27,1 гектар экин майдонлари) ва Поп туманида 31,5 гектар (шундан 24,7 гектар экин майдонлари) майдони 50 йилгача, лекин камида 30 йил муддатга ижарага берилди.
Қарорга мувофиқ, агросаноат кластерининг асосий вазифаси тупроқ унумдорлигини ошириш, экин майдонларидан оқилона ва самарали фойдаланиш ва уларни муҳофаза қилиш чора-тадбирларини амалга оширишдан иборат.
Шунингдек, қарорда Art Soft Holding» МЧЖ ва унинг таркибига кирувчи агросаноат корхоналари томонидан 2019-2020 йилларга мўлжалланган инвестиция лойиҳаларининг прогноз параметрлари тасдиқланди.
Сурат манбаи: edu.glavsprav.ru
