Обама Ўзбекистон ўз тарихидаги янги босқичга кираяпти деб ҳисоблайди
Тошкент. 6 сентябр. ЎзТАГ – АҚШ президенти Барак Обама Ўзбекистон ўз тарихидаги янги босқичга кираяпти деб ҳисоблайди. Бу ҳақида АҚШ Давлат котибининг Жанубий ва Марказий Осиё ишлари бўйича ёрдамчиси ўринбосари Даниэл Розенблюм Тошкентда 6 сентябрда бўлиб ўтган матбуот анжуманида маълум қилди, деб хабар беради Ўзбек телеграф агентлиги (ЎзТАГ).
Сиёсатчининг таъкидлашича, ушбу фикр Обаманинг Ўзбекистон Президенти Ислом Каримов вафоти муносабати билан йўллаган шанба кунги мактубида акс этган. Мактубда Америка Қўшма Штатлари Ўзбекистон билан ҳамкорликни давом этиш ниятидалиги, унинг мустақиллиги, хавфсизлиги тарафдори эканлиги таъкидланган.
“Ва биз яқин йилларда ҳамкорлигимиз мустаҳкамланиши ва кенгайишини кутмоқдамиз”, - деди Д.Розенблюм.
У Тошкентда 5 сентябрдан бери эканлиги, Ўзбекистон Президенти Ислом Каримов вафоти муносабати билан Америка Қўшма Штатлари номидан ҳамдардлик изҳор этиш учун келганлигини айтиб ўтди.
Душанба куни Даниэл Розенблюм Ўзбекистон ТИВда Абдулазиз Камилов, Сенатнинг ташқи сиёсий масалалар бўйича қўмитаси раиси Содиқ Сафоевлар билан учрашди.
“Биз раҳбарият алмашинуви ҳар қандай давлат учун қийин даврлигини тушунамиз, лекин бу муносабатларни мустаҳкамлаш вақти бўлиши ҳам мумкин”, - деб таъкидлади Даниэл Розенблюм.
