ОТМК гелиоқурилмаларни ишлатишни бошлади
Тошкент. 12 август. ЎзТАГ – Олмалиқ тоғ-металлургия комбинатида (ОТМК) янги гелиоқурилмаларни эксплуатация қилиш бошланди, дея хабар қилади Ўзбек телеграф агентлиги (ЎзТАГ).
“Ёқилғи-энергетика ресурсларини тежаш дастурига мувофиқ ОТМК Германияда ишлаб чиқарилган бир неча дона гелиоқурилмалар сотиб олди, бугунга келиб улардан учтаси комбинатнинг автомобил транспорти бўлинмаларида ўрнатилди. Бу ёқилғи-энергетика ресурслари, хусусан газни тежашда ёрдам беради. Гелиоқурилмаларни ўрнатгунга қадар биз сувни иситишда табиий газдан фойдаланар эдик. Ўтган вақт давомида 1,2 минг кубометр ёқилғи тежаб қолинди. Бу ердаги барча жараёнлар компьютерлаштирилган бўлиб, бу ишни анча енгиллаштиради”, - деб таъкидлашди ОТМК матбуот хизматида.
Эслатиб ўтамизки, “Олмалиқ ТМК” ОАЖ мамлакатдаги энг йирик тоғ-металлургия корхоналаридан бири ҳисобланади. 2013 йил натижалари бўйича комбинат 251,883 млрд сўм соф фойда олди, 2012 йилда эса корхонанинг соф фойдаси 202,374 млрд сўмга тенг бўлган эди.
