Тошкентда Француз институти ёпилганидан кейин маданий ва тилга оид тадбирларни уюштириш билан Франция элчихонаси шуғулланади
Тошкент. 3 июнь. ЎзТАГ - Тошкентда Француз институти ёпилганидан кейин маданий ва тилга оид тадбирларни уюштириш билан Франция элчихонаси шуғулланади, дея хабар беради Ўзбек телеграф агентлиги (ЎзТАГ) Франциянинг Ўзбекистондаги элчихонаси матбуот хизматига асосланган ҳолда.
Мазкур институт ҳокимият илтимосига биноан 2014 йилнинг 30 майидан бошлаб бутунлай ёпилди. Бундан кейин ва муқобил ечим топилгунга қадар маданий ва тилга оид тадбирларни уюштириш билан Франция элчихонаси шуғулланади.
Эслатиб ўтамизки, Ўзбекистондаги В. Гюго номидаги Француз институтининг фаолияти 2002 йилда бошланган бўлиб, муассаса Франция элчихонасининг фаол кўмагида фаолият юритган. Бу ерда Ўзбекистон фуқаролари пулли асосда француз тилини ўрганишлари мумкин эди.
Шунингдек, институт француз тили усталари билан учрашувлар, кўргазмалар, конференциялар уюштирар, бу ерда француз телевидениесини кўриш мумкин эди. Ўқувчиларга эса институтда бепул интернет хизматлари кўрсатилар эди.
