Тошкентда замонавий муз мажмуи барпо этилади

Тошкент. 30 май. ЎзТАГ – Ўзбекистон Президенти Шавкат Мирзиёев Тошкентда Humo Arena кўп тармоқли муз мажмуи қурилиши лойиҳасининг асосий кўрсаткичларини тасдиқлади, деб хабар беради Ўзбек телеграф агентлиги (ЎзТАГ).

Объектни лойиҳалаш ишлари билан Жанубий Кореянинг Heerim Architects & Planners компанияси, қуриш билан эса Сингапурнинг Enter Engineering компанияси шуғулланади. Бош буюртмачи – Wind Rose ширкатидир.

Умумий майдони 74 минг кв. метр бўлган янги тўрт қаватли муз мажмуи замонавий меъморчилик ечимлари, илғор технологиялар ва миллий меъморчилик анъаналарини ўзида бирлаштиради. Шаклига кўра у Хумо афсонавий қушини эслатади.

Янги аренанинг сиғими 14 минг ўринга, концертлар ўтказишда 10 минг ўринга тенг бўлади. Бу ерда спорт музейи, кафе ва ресторанлар, фитнес-марказ, дўконлар, болалар майдончаси жойлашади.

Унинг ёнидан кўпқаватли парковка ҳам қурилиши режалаштирилган.