Тожикистон компанияси автобус қатновини қайта тиклаш учун Тошкентдан жавоб кутмоқда
Тошкент. 29 май. ЎзТАГ – Тожикистон компанияси автобус қатновини қайта тиклаш учун Тошкентдан ижобий жавоб кутмоқда, деб хабар беради Тожик телеграф агентлиги (ТожикТА).
“Тожикистоннинг “Asian Express Terminal” компанияси Тошкентдан ТР ва Ўзбекистон ўртасида автобус алоқасини қайта тиклаш сўровига жавоб кутмоқда”, - деб хабар қилди компания вакили Алижон Валиев.
Валиев автобус алоқасини қайта тиклаш масаласи Ўзбекистоннинг Тожикистондаги элчихонаси билан муҳокама қилинганини ҳам айтиб ўтди. Масала ижобий ҳал бўлса, ширкат автобуслари куздан бошлаб Душанбе-Тошкент-Душанбе, Душанбе-Самарқанд-Душанбе ва Душанбе-Бухоро-Душанбе йўналишлари бўйича қатнай бошлайди.
Унинг сўзларига кўра, қатнов тикланса, тожик йўловчиларининг Россияга бориши осонлашади. Чунки улар ҳозир бунинг учун Қирғизистон орқали ўтмоқдалар.
2017 йил 11 апрелда душанбе аэропортида 25 йилда илк маротаба “Ўзбек авиалиниялари” самолёти келиб қўнган эди. 10 февралда “Сомон Эйр” тожик компанияси Тошкентга илк марта синов тариқасида учиб келди. Кейин томонлар Тошкент-Душанбе-Тошкент йўналишларида учишларни ўзбек тарафи амалга оширишига келишдилар. Икки тараф ўртасида автобус ва авиаалоқа 1992 йилда Тожикистонда фуқаролар уруши бошланганидан кейин тўхтатилган эди.
