Ўзбек олимлари кўпфункцияли қуёш қурилмасига патент олишлари мумкин
Дата: 17:04, 30-07-2014.
Тошкент. 30 июл. ЎзТАГ – Наманган Муҳандислик-технология институти олимлари кўпфункцияли қуёш қурилмасига оид ихтирога патент олишлари мумкин, дея хабар беради Ўзбек телеграф агентлиги (ЎзТАГ).
Мамлакат Интеллектуал мулк агентлигидан хабар қилишларича, ихтиродан кўзланган асосий мақсад – арзон, ресурс ва энергияни тежовчи, экологик жиҳатдан тоза совуқлик ҳамда иссиқлик агентлари (қисмлар) ва электр энергияси ишлаб чиқаришдир.
Ихтиро халқ хўжалигининг кўплаб соҳаларида яхши самара бериши мумкин. Масалан, унинг ёрдамида олинган энергия билан турли қишлоқ хўжалиги маҳсулотларини (чигитли пахта, ерёнғоқ, мева ва сабзовотлар) қуритиш ҳамда сақлаш, иссиқхоналарни қиздириш мумкин.
Муаллифлар томонидан ихтирога патент олиш учун талабнома топширилди.
