Ўзбек тадбиркорлари ЯИДХП орқали автомобиль харид қилиш имкониятига эга бўлдилар

Тошкент. 16 сентябр. ЎзТАГ – Ўзбекистонда Ягона интерактив давлат хизматлари порталида (ЯИДХП) мамлакатда ишлаб чиқарилган автомобилларни харид қилиш учун электрон навбат жорий қилинди, дея хабар беради Ўзбек телеграф агентлиги (ЎзТАГ).

ЯИДХПдаги ушбу хизмат “Тадбиркорлик субъектлари эҳтиёжлари учун Ўзбекистонда ишлаб чиқарилган автотранспорт воситаларини харид қилиш учун буюртма тақдим этиш” деб номланади.

“Эндиликда бизнес фаолияти учун Ўзбекистонда ишлаб чиқарилган енгил ёки тижорат транспорти воситаларини харид қилмоқчи бўлган тадбиркорлар, иш жойларини тарк этмаган ҳолда автотранспорт модели ва ҳудудий дилерни танлашлари, ҳамда кейинчалик ушбу моделни танланган дилердан харид қилиш учун олдиндан банд этиб қўйиш имкониятига эга бўлдилар. Банд қилиш учун “GM Uzbekistan”, “Самарқанд Автомобиль Заводи” ва “JV MAN Auto – Uzbekistan” каби маҳаллий ишлаб чиқарувчиларнинг моделлари тақдим этилган”, - деб таъкидлашди ЯИДХП матбуот хизматида.