Ўзбек ва қозоқ компаниялари янги авто моделларини чиқаришни йўлга қўйишни режалаштирмоқдалар
Тошкент. 15 июл. ЎзТАГ – Ўзбек ва қозоқ компаниялари кооперация алоқаларини йўлга қўйиш ва биргаликда бутловчи қисмлар ҳамда янги автомобиль моделларини ишлаб чиқаришни ташкил қилишни режалаштирмоқдалар, деб хабар қилди Sputnik-Ўзбекистон мухбирига Қозоғистон элчиси Ерик Утембоев.
Унинг сўзларига кўра, 21 июлда етакчи қозоқ авто ишлаб чиқарувчиларидан бири бўлган “Сариарка Авто Пром”нинг нуфузли делегацияси Ўзбекистонга келади. Бу ширкат кўп турдаги Toyota, Hyundai, SsangYong, Geely, JAC автомобиллари ва Iveco махсус техникаларини ишлаб чиқаради.
“Қозоқ делегацияси “Самарқанд автомобиль заводи”, GM Uzbekistan, JV MAN Auto-Uzbekistan каби йирик ўзбек автомобиль корхоналарига ташриф буюради. Унинг таркибида умумий масалаларни эмас, балки қўшма лойиҳалар яратиш бўйича конкрет режаларни муҳокама қилувчи мутахассис ва инженерлар бўлади”, - деб таъкидлади элчи.
Қозоқ томонини компонентлар ва эҳтиёт қисмлар ишлаб чиқариш бўйича қўшма корхона яратиш, икки мамлакат бозорларида талаб юқори бўлган автомобиллар ишлаб чиқариш масаласи қизиқтирмоқда.
Дипломатнинг сўзларига кўра, экспорт режалари юқоридаги икки мамлакат билан чегараланиб қолмайди. Чунки Қозоғистон янги ҚК маҳсулоти учун Евроосиё иқтисодий иттифоқи бозорига дарвоза вазифасини ўташи мумкин.
“Мамлакатларимиз замонавий иқтисодий шароитларда янги кооперация моделларини топишлари зарур. Биз у ёки бу ерда ишлаб чиқарилаётган маҳсулотларни қайта чиқаришни таклиф қилаётганимиз йўқ, аксинча, биз ҳар икки бозор ва бошқа мамлакатларда талаб катта бўлган ва айни пайтда ҳамкорлардан бирида ишлаб чиқарилмайдиган маҳсулотни топишимиз мумкин”.
Эслатиб ўтамизки, бугунда ўзбек автосаноати Россия авто бозоридаги пасайиш натижасида ўз экспортини диверсификация қилишга ҳаракат қилмоқда. Хусусан, компания ўз моделларини аъанавий бўлмаган африка ва лотин америкаси бозорлари, шунингдек, Яқин Шарқда тақдим этмоқда.
