Ўзбекистон миллий авиакомпанияси Россияга 700 тонна атрофида қишлоқ хўжалик маҳсулотлари жўнатди
Тошкент. 21 июл. ЎзТАГ – 2016 йилнинг биринчи ярми якунлари бўйича “Ўзбекистон ҳаво йўллари” миллий авиакомпанияси Россияга 700 тонна атрофида қишлоқ хўжалик маҳсулотлари жўнатди, деб хабар беради Ўзбек телеграф агентлиги (ЎзТАГ).
“Ўзбекистондан олиб кетилаётган қишлоқ хўжалик маҳсулотларини қабул қилиб олиш бўйича 530 тонна атрофида юкни қайта ишлаган “Домодедово” аэропорти етакчилик қилмоқда. Шунингдек, Санкт-Петербург, Тюмень, Уфа, Екатеринбург, Самара ва Ростов аэропортларига ҳам анча юклар етказиб берилди”, – деб таъкидлашди авиакомпанияда.
Бугунги кунда ўзбек авиакомпаниясининг қувватлари “Тошкент” аэропортидан ҳар куни 84 тоннагача турли юкларни ташиш, 10 вилоят аэропортларининг қуввати эса ҳафтасига 200 тонна атрофида юклар ташишга имкон беради. Айни пайтда Тошкентдан фақат Москванинг ўзига кунига 26 тонна, вилоятлардаги нуқталаридан 10 тоннадан мева ва сабзовотлар жўнатиш мумкин.
