Ўзбекистон президенти “Чорвоқ” эркин туристик ҳудудини ташкил этиш ҳақида топшириқ берди

Тошкент. 6 декабр. ЎзТАГ – Ўзбекистон президенти Шавкат Мирзиёев “Чорвоқ” эркин туристик ҳудудини ташкил этиш ҳақида топшириқ берди, деб хабар беради Ўзбек телеграф агентлиги (ЎзТАГ).

Бу давлат раҳбарининг “Чорвоқ” эркин туристик ҳудудини ташкил этиш тўғрисидаги фармони билан кўзда тутилган. 

“Ўзбекистон Республикаси Вазирлар Маҳкамаси, Туризмни ривожлантириш давлат қўмитаси, Тошкент вилояти ҳокимлиги, “Энергия тежаш миллий компанияси” АЖ, Ўзбекистон Республикаси Ташқи иқтисодий фаолият миллий банкининг Тошкент вилоятининг Чимён-Чорвоқ курорт-рекреация зонаси чегараси доирасида “Чорвоқ” эркин туристик зонасини ташкил этиш тўғрисидаги таклифларига розилик берилсин”, - дейилади ҳужжатда.

Эркин туристик зона ҳудудида замонавий меҳмонхона мажмуалари, маданий-соғломлаштириш, савдо-кўнгилочар ва туристик аҳамиятдаги бошқа объектлар, туризм инфратузилмаси объектлари қурилади.

Ҳужжатга мувофиқ, “эркин туристик зона ва эркин туристик зона иштирокчилари сифатида рўйхатга олинган тадбиркорлик субъектларига эркин иқтисодий зоналар тўғрисидаги қонун ҳужжатларининг қоидалари, шу жумладан, эркин иқтисодий зоналар ва улар иштирокчилари учун назарда тутилган барча имтиёз ва преференциялар татбиқ этилади”.

Айни пайтда эркин туристик зонанинг фаолият кўрсатиш муддати кейинчалик узайтириш имконияти билан 30 йилни ташкил қилади.